La Usc di Ladins

Bele ai 24 de ma dl 2022 â la Junta Provinziala aprové les carateristiches tecniches por la costruziun de n rondel tla burcia da Picolin. Ai 9 de messé de chësc ann á metü man la valutaziun dles ofertes gnüdes ite. "I tignun cunt da mëte man i laurs da d’altonn", dij le diretur dl ofize tecnich strades nord–ost Umberto Simone. "Le rondel nü a Picolin porta pro a plü segurté y dess rovëne miú le flus dl trafich", injunta l’assessur ala mobilité y infrastrotöres Daniel Alfreider. Le rondel nü sön la strada statala dla Val Badia ará n diameter de 32 metri y tolará ite le post dla burcia a T. Dlungia la costruziun dl rondel gnarál ince fat danü y renforzé le mür sura la burcia, che gnará sposté de 60 cm cuntra munt. Le proiet prevëiga n cost de 1,2 miliuns de euro. Por la costruziun él gnü invié 10 firmes da fá oferta. La surandada di laurs gnará fata aladô dl prisc plü bas.  (pablo)