La Usc di Ladins

Jí tl’America é forsc le some de tröc jogn. En chësc ann ti ára toché a Bettina Grünfelder d’Al Plan, che é piada ia de forá por jí impröma tl Canada y spo jö ti USA. Zënza orëi, ti éra insciö sciampada a döt le patatrac che é salté fora tla Talia por gauja dl coronavirus: degun "lockdown", degun bombardamënt mediatich y social-mediatich sön le Covid. Le virus é sambëgn ince rové laía, mo les mosöres ne n’é nia stades tan rigoroses, sciöche ara cunta. Ai pröms de ma éra spo piada zoruch y le iade cina a ciasa é sté n’aventöra, cun n program da gní zoruch che n’é nia, informaziuns desvalies y falades, y ala fin l’aiüt de n compagn. Ara nes á cunté süa esperiënza.

La Usc:

• Bettina Grünfelder te un di bi momënc delá dal ozean. (Foto: privat)
•  

View the embedded image gallery online at:
https://www.lausc.it/12762-zoruch-dai-usa-mo-ci-traina#sigProId73e7eb1a21

Bettina, co ê pa la situaziun ti USA, tles ultimes edemes che t’ês laia?
Bettina Grünfelder: Ai â bëgn saré jö döt, stlüt restoranc, desdit manifestaziuns y ci che ê publich, mo la vita jô impó inant scialdi normal. Sce te jôs a cumpré ite te vistîste le mascherot y manëces, mo nia che an foss stá sará te ciasa. Te botëga êl da tigní les destanzes, al ê plexiglas ples casses y i.i.

T’es stada demez cina ai pröms de ma. An pó dí che te ti es avisa "sciampada" al "lockdown" tla Talia...
Al n’ê pa nia orü insciö. Canche i sun piada ia, n’êl tló ciamó nia de döt chësc. Al á metü man canche i ê bele laía. Dijun che i á mefo abiné le dër momënt por m’un jí, i sun stada tl dër momënt tl dër post. (s’la rí)

Tüa esperiënza particolara aste spo fat da gní zoruch. Can este pa piada ca?
Pordërt essi orü gní ca ai 20 de ma, mo spo m’ái ala fin d’aurí straiché le jore, insciö ái messü nen tó n ater y gní denant.

Aste messü fá val’ de particolar denanco pié ca, o t’aste pa informé pro zacai?
M’arjigné ca pordërt no, deache al n’ê degügn che savô da me dí avisa ci che i messâ fá. Insciö ái messü m’organisé instëssa. Vignun che i damanâ, me dijô val’ d’ater. I ne savô nia plü a ci y che crëie. I sun rovada al punt che i chirî ma plü döes porsones che me dijess le medemo. I á ince damané pro istituziuns y personaji politics: vignun dijô val’ d’ater, d’atri ne m’á gnanca dé resposta. Dal punt d’odüda dl’organisaziun sunsi stada dassora.

Ci soluziun che ara á tut, ci groaries che ara á incunté y tan di che so iade á doré, podëise lí t’La Usc di Ladins di 28 de ma.  (Intervista: Pablo Palfrader)