La Usc di Ladins

Anché, 12 de dezember 2024, l Corp Nazionèl de Socors Alpin e Speleologich (CNSAS), metù su del 1954, l compiesc 70 egn. N travert che testimoniea sia longia storia de empegn zenza pausses per didèr fora la persones che se troa en dificoltà su per i crepes o te cougoi e troes senestres. N empegn che vegn palesà dal numer granac de si intervenc: passa 232.000, e de chisc zirca mec demò ti ultimes 10 egn, con n livel de profescionalità e endrez tecnologich che à seghità a crescer e miorèr.  

Beleche 250.000 persones à podù aer salvament te chisc egn da omegn e femenes del Socors da Mont, e l numer de ores che l é stat metù a la leta per duc chisc intervenc no l é nience da poder dombrèr. 

En ocajion de chest cedean, al Socors Alpin e Speleologich ge é stat sport n recognosciment de gran prestije: la Medaa de or al Merit zivil de la Republica talièna. La consegna é stata anché te la Prefetura de Milan: l Prefet  Claudio Sgaraglia ge à consegnà al president del CNSAS, l ladin da Moena Maurizio Dellantonio, la Medaa de or che premia l valor, l sacrifize e l empegn al ben de la comunanza nazionèla de dut l Corp te 70 egn de atività.

N messaje de augures ai omegn e a la femenes del Socors é stat sport ence da man de Papa Francesch, che travers l Secretèr de Stat, cardinal Pietro Parolin, l à sotlineà la stima e l respet che l CNSAS se à vadagnà te sia storia.  (Lucia Gross)