La Usc di Ladins

En mèrtesc passà son passèda tedant al ofize di foresć de Poza che l é apedeju l ofize de la Posta. En or su l usc, su per i mures e dut intornvia l era pien de sac de la posta. I ne à dit che i é piens de paches e pachec de compres online che rua te ofize de la Posta olache i cogn vegnir vardé fora, spartii e consegné en giornèda. I ne à dit che n sarà stat 600, e coscita sozede ogne dì.

Se sà che Poste Italiane à sotescrit na colaborazion con Amazon per ge garantir la consegna semper più asvelta de la roba comprèda online travers l servije di postins. »L svilup de la potenzialitèdes de la colaborazion con Amazon l é coerent con la strategia de Poste Italiane de smaorament de la logistica leèda a la compres online travers investimenc tecnologics, cordanzes con partner strategics e l’ativazion de servijes semper più vejins ai besegnes di sentadins che compra online e de la firmes atives te la vendita de prodoc su Internet« se lec sul sit internet de Poste Italiane. 

Él chesta l’idea de servijes semper più vejins ai besegnes di sentadins che vel sporjer la Postes? Él chesta la parbuda che volon ge dèr a nesc ghesć che va te ofize di foresć e se troa tedant pien de sac? E dut chest te mez paisc, te la piaza più bela.

De più su La Usc stampèda de en vender ai 13 de dezember.  (Monica Cigolla)