La Usc di Ladins

»Per noi la roba più emportanta no l é venjer, l é no se perder i bec do strada. Aon n doer emportant, no basta più ensegnar a jiar a balon, cognon ensegnar comportamenc, a respetar le regole, i jiadores, i alenadores e l publich. L balon l é n sport che te enjigna a la vita, l te ensegna a venjer e a perder, l te dasc sodesfazion ma ence delujion e l é chest chel che proarà te la vita nesc bec e joegn canche i doventarà gregn, nosc ruol l é chel de i enjignar.« Paroles emportantes, riches de stimoi e de valores che l vizepresident del Fascia Balon Pierpaolo Trottner à uzà fora en vender ai 13 de dezember a la cena anuèla de la sociazion sportiva.

Chest an la cena é stata amò più de valuta ajache l Fascia Balon à volù ge fèr n omaje al ‘presidentiscim’ Walter Ghetta, l rengrazièr per dut chel che l à fat da canche del 1978, con de etres fondadores, l à metù su la sozietà. Te chisc egn l é semper stat na prejenza costanta e segura, n pont de referiment per duc, semper sul ciamp, semper ascort e vertech a responer a ogne besegn, enceben che la sanità te chest ultim temp lo aesse fat stentèr. »Walter l é l pare del Fascia Balon l ne à didà a crescer e a jir inant.« Coscita à dit Pierpaolo Trottner, che ades tolarà su proprio da Walter Ghetta l testamonech de president de la sociazion.

De più su La Usc stampèda de en mèrtesc ai 24 de dezember.  (Monica Cigolla)