La Usc di Ladins

Proietanc y tecnics, y sambëgn düc i privac y interessá, pó da val’ de incá se colié ala plataforma digitala dla Provinzia "Geobrowser Maps" y ince "GeoKatalog". Ai ciafa informaziuns nöies, dantadöt fotografies (orthofotos) realisades dl 2020 cun registraziuns nöies fates tl aier.
Orthofotos é retrac fedei ala realté y ala suraspersa dla tera, realisades tres prozedimënc fotogrametrics da retrac fac dal alt y dai satelic. Orthofotos pó porchël gní aratá a livel geometrich desco na cherta geografica menüda.
Tles "Geobrowser Maps" pón ciaré ite te dac interessanc de cataster, parzeles, ciases y numeri zivics, planns regoladus comunai cun i raiuns da frabiché y de prigo, de strotöres y de döta la infrastrotöra.

Söl retrat: Le raiun de Fanes söla orthofoto (geobrowser)  (Iaco Rigo)