La Usc di Ladins

La é ruèda al  numer 40, la Conferenza de la mendranzes de la Provinzia de Trent. En mèrtesc ai 28 de jené la é stata chiamèda ite denef online, desche la ultima outes, e desche l'ultima outa a la vidèr no l é stat Maurizio Fugatti. L president de la PAT, che l à ence la delega a la mendranzes linguistiches, l à enciarià ence chest’outa l assessor Simone Marchiori, che apede a la politiches de abitajon e patrimonie l se cruzia ence de la promozion de la cognoscenza de l'autonomia.

Marchiori, adum con la dirigenta del Servije Mendranzes de la Provinzia Elisabetta Sovilla, l à rejonà de la linies programatiches per la politiches de stravardament e promozion delle minoranze e deschiarì la dotazions de bilanz che la PAT pel meter a la leta de ladins, mochegn e zimbres per l an 2025: na soma de zirca 650 mile euro, che ampò no cour deldut la domanes de finanziament ruèdes ite, e che é spartida anter Pian de l’informazion, scomenzadives metudes a jir diretamenter da la PAT, sostegn a intervenc segnificatives de istituzions di lesc de mendranza e Pian organich del Comun General de Fascia.

La Conferenza é stata chiamèda ite soraldut per aer i pareres da man di raprejentanc de ladins, mochegn e zimbres, obligatories aldò de la lege provinzièla 6/2008 su la mendranzes, en cont del program de intervenc per l’informazion per l an 2025 e de la spartijon del Fondo provinzièl per la mendranze. A l’informazion, conscidrèda fondamentèla per l stravardament di lengac de mendranza, va la pèrt maora: zirca 413 mile euro, e de chisc 133.000 a desvaliva scomenzadives de mochegn e zimbres e 280.000 per i ladins, e de chisc zirca 175.000 al Comun General de Fascia e 105.000 a l’Union Generela di Ladins dla Dolomites per sostegn a la redazion de Fascia de La Usc di Ladins.

Podede lejer dut su La Usc stampèda de en vender ai 31 de jené.

 (Lucia Gross)