La Usc di Ladins

Nos dl Comité di Jogn da La Val un organisé l’ann passé n curs de spagnol tigní da Gemma Garriga. Te indöt ot sentades á i 20 partezipanc de döta la Val Badia imparé da se presenté y da fá smalltalk por spagnol y sura tradiziuns y usanzes tla Spagna. Stlüt jö se á le curs cun na jita de trëi dis a Barcelona, por mostré ci che i un imparé. A Barcelona unse vijité deplü atraziuns turistiches, sciöche la Sagrada Família y la Ciasa Batlló. Implü se á Gemma mostré süa cite y cunté sura Barcelona y le stil de vita di spagnoi. Ci che é por nos ince sté n gran devertimënt, é sté da jí cun i go–kart, da fá lasertag, chidlé y fá jüc da trampolin. Sambëgn unse ince tut pert ala vita de nöt a Barcelona y ci che ne podô nia mancé ê la buna ciasadafüch spagnola. Por stlü jö chësta bela fin dl’edema plëna de aventöres y devertimënt, sunse ciamó jüs a ciaré le florí dl sorëdl cun n bel panorama sura la cité. I oresson ince tó l’ocajiun por rengrazié Gemma por döt ci che i un podü imparé y de so laur da mënaturisć a Barcelona. ¡Hasta pronto! (Comité di Jogn da La Val)

Chësta y ciamó d’atres noeles y ativités ciafëise sön la Plata dla Jonëza, t’La Usc di 31 de jená 2024