La Usc di Ladins

Una de la domanes che vegn semper fora en ocajion del dì de la memoria l é: »Co él stat possibol n tèl massacher, na tèl ingiustizia?«. Te la scoles, ti mesi de informazion, endèna i evenc e la reflescions publiches se se domana coche la é stata che sot l nazism, mile e mile persones normales, zitadins e zitadines todesc, les abie podù colaborèr, zenza se meter de contra, a la politiches de eliminazion razièla e al sistem che à portà l nazifascism a copèr zirca 16 milions de persones (aldò di dac del Museo di Stac Unii per la Memoria del Olocaust) per rejons religiouses, etniches, razièles, politiches. La domana la é giusta e emportanta, ma no podon se contentèr. Manco atenzion se ge dèsc belapontin a n’autra domana, la domana che dalbon pel empienir de segnificat per l prejent la giornèda dedichèda a la memoria de la Shoah: »Co podone nos emparèr da la storia e fèr a na vida che no sie mai più possibol, per duc i popui, n sistem de ingiustizia e dejumanità desche chel metù su dal nazism?«.

Che che l é sozedù tel secol passà l cogn ne spenjer a vardèr con eies critics no demò la sozietà europeèna del secol passà, ma soraldut noscia sozietà d’aldidanché, l cogn ne spenjer a se domanèr se fosc ence te nosc prejent no sion nos i prumes a normalisèr ingiustizies de chesta sort.

Ai 17 de otober del 2023, canche la vera te anter Israel e la Palestina la era tachèda da pec dis, l ospedèl Al Ahli de Gaza l é stat bombardà. L’esplojion à caujà più che 400 morc. Fosc recordarede coche ti dis do i media taliegn (e coscita duc chi ozidentèi) i chieria de capir coche n ospedèl, na strutura che no cognessa vegnir tachèda nience sot vera, l podea esser stat obietif de n atach. Ai notizières e sui foli se sentia dir: cogn esser stat n fal. Di israeliegn, che i aea tocà l fabricat falà, o adertura de la forzes de la resistenza palestineisa, che le aessa comanà mèl n raz, tant da se ciapèr enstesses. Coche la é jita dalbon te chela not amò no l saon, ampò saon che enlouta ne someaa empossibol, da no poder azetèr, che n ospedèl l podesse esser n obietif de vera.

Suton ades inant de n an e passa. Col scomenz del 2025 duc e 36 i ospedèi de Gaza i é stac taché da l’armèdes israelianes. De chisc, 20 i é stac dessaté daldut o danejé tant da no poder più curèr nesciugn. I 16 che vanza i rua a esser amò operatives, ma demò en pèrt e con de gran dificoltèdes. I sudé israeliegn i à tout de mira a na vida sistematica obietives zivii desche scoles e ospedèi, tant che Volker Türk, comissarie de la Nazions Unides per i deric del om, l à dit che a Gaza »aer tal dos na telara biencia da dotor l é desche jir stroz con n tulac su la schena«.

Podede lejer duta la reflescion su La Usc stampèda de en vender ai 31 de jené.

 (Tita Dorich)