La Usc di Ladins

I pó capí che doía stál, bunamënter, la mancianza de informaziuns plü monüdes. Y porchël arati che al sides dërt da respogne y ciaré da tlarí n valgünes chestiuns.
Döta la cossa é piada ia dan da n ann y mez, plü o manco, canche l’assessorat provinzial por la Cultura ladina á ponsé da curí na locia che nosta Provinzia á respet a tröpes d’atres regiuns dla Talia, chëra de n inventar digital, organich, coerënt y unitar, de so patrimone cultural imaterial (usanzes y tradiziuns, festes, rituai, conescënzes y savëi che ciafa espresciun a usc y tres rapresentaziuns artistiches desvalies…). Che n’aministraziun provinziala se fistidiëies da cöie adüm, cataloghé y inventarié le gran scrin de cultura imateriala presënt sön so teritore é zënz’ater val’ de bun y val’ de dërt.
Tratan la fasa de confrunt y de proietaziun de na te’ sort de archif digital, él gnü ponsé ai tröc aspec che caraterisëia la cultura ladina, a ci che é ciamó bun da identifiché y porté adöm i ladins. Y un de chisc aspec é le gran numer de liëndes y cunties che roda dötaurela incër les valades dl Sela ia, liëndes che vëgn sintides vies y che ispirëia y alimentëia tres ciamó espresciuns culturales desfarëntes y de gran valüta.
Deplü de nos á lit i articui dla professuria Ulrike Kindl, mo chiló ne nen vára nia de descusciuns scientifiches, y al n’é nia fondamental da savëi sce Karl Felix Wolff á albü fontanes desvalies y nia coerëntes tl mëte adöm les liëndes dl Rëgn de Fanes, sce al á metü tröpa o pücia de süa imaginaziun lapró, sce al ti fala autentizité o atendibilité storiografica a sües racoiüdes. Chiló nen vára dl significat y dla faziun culturala che chës liëndes á aldedaincö, dl’espresciun identitara che ares é bunes da trasmëte a döta la popolaziun ladina. Avisa porchël se miriteres da gní mantignides y a vigni moda valorisades, y le porvé da ciafé n reconescimënt Unesco vá tla direziun dla valorisaziun de chësc patrimone, a chël che i ne orun nia renunzié. Deache la finalité dl’istituziun Unesco é da fá crësce tles comunités la cosciënza dla presënza de n elemënt cultural particolar, por che chësc elemënt vëgnes stravardé y promoiü. Nia deplü y nia demanco! L’Unesco ne se damana nia l’esclusivité o l’origina autenticada de n patrimone cultural imaterial. Ara ne ciara nia ales raisc, mo ai früc. Al se damana che al vires, che al sides n fatur de identificaziun y de coejiun comunitara. Ci che – de facto – á les liëndes ladines bele dadî desmostré da ester.

Carlo Suani, coordinadú dl proiet