La Usc di Ladins

Sarà Asiago-Lubiana la finèla de Alps Hockey League. Dò la semifinèles che à resservà tropes colpes de scena, se à dezidù coluna che sarà la doi formazions che se jiarà l titol lonch na sajon. No l’é stat doi endesfides banales cheles che à portà al verdet, con la venta »al miec de les cinch« che é ruèda tant per i venec, che à tel roaster i frèdes fascegn Stefano e Michele Marchetti, che per i slovens te l’ultima partida.
La semifinèla anter Jesenice e Asiago é scomenzèda ai 8 de oril con la venta di slovens vadagnèda ai OT (4:3, J). Da enlouta la reazion di Campions taliegn che à portà en parità l’endesfida con la venta di 10 de oril (4:1, A) e l vantac con chela di 13 (3:5, A). L’Hodegart aessa podù ge dèr alberch a l’endesfida dezisiva ai 15, ma la venta del Jesenice amò ai OT (2:3, J) à sperlongià l verdet. E coscita gara-5 dezisiva te la Slovenia, olache se à metù al luster l fascian Michele Marchetti. Con doi goi defat, l’atlet ladin l’à dezidù l’endesfida venta da l’Asiago per 2 a 1, ge regalan a sia squadra la finèla. Pest coletif, ma ence personèl ajache de gra a chesta prestazion Marchetti l’é stat nominà mior jiador de l’ultima giornèda de semifinèles.
L’endesfida per l titol vegn jièda al miec de les cinch scomenzan con la pruma trei partides ai 20, 22 e 24 de oril. Se chestes no bastassa a aer n campion, gara-4 ai 26 e eventuèla gara-5 ai 28 del meis. L Lubiana, per merit de classifica, arà l vantac de cèsa, scomenzan a jièr la pruma partida te la Slovenia.

De più su La Usc stampèda de vender ai 23 de oril.




con foto: Michele Marchetti, doi goi che à portà l’Asiago en finèla (foto Vito de Romeo)


 (Daniele Verra)