La Usc di Ladins

Dut l é vertech per poder peèr via endò da nef con na neva edizion de la “Val di Fassa Running”, più avisa la numer 22.

L Comitat de endrez, con a cef Armando Mich, l é enjignà do 2 egn feré dal Covid a meter dant una de la garejèdes a tapes che te passa 20 egn se à vadagnà gran nonzech e che à jà arjont na bona partezipazion.

A engolardir i partezipanc, apede al gust de corer, l piajer de poder l fèr te anter i paesajes più bie de la Dolomites de Fascia, e da l’autra man la segureza de poder fèr cont sun na formula che se à consolidà te egn de esperienza e che vegn portèda inant zenza mudamenc.

Se pea via la domenia con la pruma tapa e dapò dì per dì se passa fira duc i paijes de la val, con n dì de paussa de mercol e l final con la gran tapa dolomitica de vender. 

En dut 62,8 chilometres con n dislivel sun 5 tapes de 3.188 metres ti percorsc metui ju da Ornella Tarter con l staff de endrez.

En domenia se pea via e se rua a Fontanac passan da Mazin e Pera te 12,9 km. En lunesc l percors sarà più curt ma più senester, 10,7 km e 430 metres de dislivel per jir da Vich fin sa Valongia e Tamion e ju de retorn.

 En mèrtesc dut se tramuda ja Moena, da olache i concorenc jirà sa Penia e sun Sort su na streca de 13,7 km. Do la paussa del mercol per jir a se veder la val, la jebia la garejèda pearà via da Soraga per jir envers Ponta Valacia e ju de retorn. L ultim gran sforz sarà chel del vender, demò sul ert, per jir da Poza fin sa Bufaure, olache l publich podarà ruèr ence con l impiant per tor pèrt a la premiazion e veder chi che sarà chest an a se vadagnèr l titol che del 2019 l é jit a Celestin Nihorimbere e per eles a Addisalem Tegegn.

Se pel amò se scriver ite dal sit www.valdifassarunning.it  (LG)