La Usc di Ladins

Al ê bele dal 2019 incá che al ne gnô nia plü metü a jí la Roda de Col Toronn. N iade êl ciarestia de nëi y danterite él ince sté i agn strambi dl Covid. En domënia ai 14 d’aurí ésera stada tan inant y i organisadus dl Aiüt Alpin Mareo é atira gnüs premiá cun n de spetacolar, ciamó senté ite te na contrada da d’invern mo cun n sorëdl che á scinché temperatöres d’aisciöda tardia, por ne dí nia cuaji da d’isté. La gara cun scuadres da trëi porsones é rovada en chësc ann a süa 33.ejima ediziun y á albü le start y le travert pro la Ücia Lavarella. Garaté él na festa de sport, buna löna y aurela cörta, cun na dërta cumpëda de scuadres che s’á scrit ite.
La maiú pert dles scuadres á tut l’ocajiun da se fá na bela schitour tla contrada liendara dla munt de Fanes: chësc spliga ince le gran numer de 29 scuadres che á tut pert tla categoria "hobby", na categoria nia competitiva olache al ne gnô nia tut jö i tëmps. Lapró él sté sis scuadres che s’á anunzié por la categoria de gara "Race" y sis é ince stades ala pert tla categoria speziala "Aiüt Alpin", olache al ê de vigni sort de proes da desfiré do le percurs. Pro la categoria "Race" á davagné le team "Badiasport A" cun Alex Dagai, Jan Paul Adang y Lois Craffonara, che á metü sö le tëmp de 51:17. Tla categoria dl Aiüt Alpin él sté i alpinisć de ciasa che á albü la miú. La scuadra dl Aiüt Alpin Mareo cun Paul Willeit, Max Willeit y Simon Kehrer á taié le travert cun le tëmp de 1:13.55.

Dötes les classifiches ciafëise t’La Usc di Ladins di 19 d’aurí  (pablo)