La Usc di Ladins

Luca Pescollderungg ti l’á fata. Le "spartan racer" da La Ila á davgné en vëndres ai 5 de messé le "Spartan 2024 ultra worls championship", le campionat dl monn ultra. La gara de 50 km, tignida a Morzine tla Francia, ál davagné cun le tëmp de 6:48:52. Secundo post por le franzesc Thibault Jean cun 7:03:25; terzo Nikolaj Dam dla Danimarca cun 7:20:57. Luca instës le lascia alsavëi cun döes parores sön so profil Facebook: "World Champion".

Chësta gran sodesfaziun sportiva vëgn apresciapüch n mëis do che al á davagné le Ultra Spartan Race da Andorra. Intervisté da La Usc di Ladins ti ânse fat la domanda: "Y sëgn le campionat mondial de Spartan Race a Morzine?" Luca â respognü insciö:
"Sce, le proscim travert é chël. Te döes edemes él le campionat mondial de Spartan Race sön la destanza lungia a Morzine. I conësci le post ajache i á bele garejé ailó y ince davagné plü iadi mo nia ciamó sön la destanza lungia de 50 km. I me aspeti n percurs n pü sciöche chiló te nostes munts, cun tröp deslivel, che se damana tröpa tecnica y i speri d’avëi n bun de. Spo podessi m’la soghé bun, ince cun na concorënza de livel alt. Ala fin me recordi tres che iö n’á nia da perde, i ne sun nia n profi. Sc’i perdi vëgni indô zoruch a lauré inant, y sc’i davagni, spo vëgni ince zoruch a lauré, madër plü contënt."

Bëgn Luca, travert arjunt. Complimënc!