La Usc di Ladins

La é ruèda a Soraga en sabeda ai 13 de messèl la squadra del Genoa per passèr doi setemènes de arcedament sa mont. I jiadores, alenadores e staff tecnich à ciapà l benvegnù da n bel grop de sostegnidores, anter chisc i bec del Genoa Camp, che li spetèa tedant al Hotel Dolomia. Do la marena e na picola paussa i é jic sobito sul ciamp Benatti de Moena per la pruma sescion de arcedamenc.
L secondo dì l é jà stat jià fora la pruma partida da peconc: l Genoa à scontrà i jiadores del Fascia Balon che enceben la desferenza dal pont de veduda tecnich i se l’à jièda fora dalbon ben. L resultat finèl l é stat de 17 a 1, l soul gol fascian é stat segnà da Massimo Lorenz che, descheche i à scrit su la piata Facebook de la sozietà »l é stat n eurogol! Eraane 5 a 1 a la fin del prum temp e aon abù autre doi ocajion semper con Max e Pat, dapò tel secondo temp aon destacà la spina. Aon jià contra aversaries che no l é proprio nosc metro de paragon, ma aboncont l é stat na partida spetacolara!«

L Genoa l é l secondo an che l rua te Fascia e l restarà a se arcedèr ai fresc fin ai 26 de messèl. Sarà dis de valutazion per mister Gilardino, per rodèr i efetives e per envièr via i joegn, en vista del nef campionat de serie A che taca ite jà ai 17 de aost.

L é pervedù amò autra doi partides da peconc: en sabeda ai 20 contra l Venezia FC e en jebia ai 25 contra l Mantova 1911, semper da les 17:00.

De più su La Usc stampèda de en vender ai 19 de messèl del 2024


 (MCI)