La Usc di Ladins

Nöia Todëscia á odü tla fin dl’edema passada le gran final dla sajun de copa dl monn de liösa sön pista naturala. Al é sté n gran final de n gröm de versc, ince deache al ê l’ultima gara por trëi de gran campiuns de chësc sport: Evelin Lanthaler, Patrick Pigneter y nosc Florian Clara da Lungiarü. Y rodunt Florian Clara n’ess nia podü stlü jö damí. Dan la finala êl tla classifica generala ma 5 punc do le concorënt austriach Michael Scheikl. Chësc orô dí: che che ê dant tla gara, davagnâ ince la Copa. Y Clara á albü i nerfs plü stersc. Cun le miú tëmp te intrames les manche ál davagné la gara – la cuarta devënta de chësta sajun – y al á ince davagné süa pröma copa de cristal tl singul. La incoronaziun de na cariera che l’á odü sciöche gran protagonist. Tl dopl cun Patrick Pigneter ál davagné 13 copes dl monn, 68 gares y 5 medaies d’or pro i campionac mondiai. Tl singul ál davagné cater gares iniann y süa pröma copa dl monn. N gran resultat, n gran campiun.  (pablo)