La Usc di Ladins

Zacan n de che i me fajô na roda da Al Plan ite por bosch cuntra le fitness, sunsi rové pro na costruziun demorvëia. I me ponsâ: "Ocio, él mo gnü le pröm ’tiny house’ (mini ciasa) te Mareo?" Na picia ciasina sön rodes cun falzades de lëgn, de beles gran finestres, na stiga de lëgn da jí ite. Canche i sun jü pormez, odôi alaleria na liacia de lëgna arcunciada sö, de pici badis da fá la blëita y taís da slisoré söla nëi. Sön porta la scrita "Zbergli de bosch". Spo ái capí!
Insciö se tlama la pröma "scolina te bosch" te Mareo. "Scolina" ne pón pordërt nia ti dí, deache al n’é nia na strotöra reconesciüda. "I sun porchël n grup de jüc te bosch", dij les promoturies Vanessa Mutschlechner y Susy Mutschlechner, ch’i á incunté l’edema passada. Vanessa á fat na formaziun da acompagnadëssa tla natöra por mituns, Susy na formaziun de pedagogia dla natöra salvaria. La idea da mëte sö chësta scolina é nasciüda bele dan da passa n ann y la dërta ocajiun da la concretisé é garatada tres le proiet "La Pli – n tesur da descurí", olache le Comun de Mareo á ciafé n contribut de 1,6 miliuns de euro por le proiet, y olache al n’é ciamó gnü metü a desposiziun 2 miliuns por iniziatives privates. Öna de chëstes iniziatives é chëra de Vanessa y Susy, che socodësc da setëmber incá na desëna de pici mituns, cun ativités tla natöra. A d’ëres ti unse damané co che i "Zbergli de bosch" é nasciüs, co che l’ativité é struturada, tan che i geniturs paia y co che an se finanziëia.

La intervista cun Vanessa y Susy podëise lí t’La Usc di Ladins di 21 de forá  (Intervista: Pablo Palfrader)