La Usc di Ladins

L Consei General del Comun General de Fascia, te sia ultima scontrèda stata ai 5 de firé, l à aproà na convenzion co la Magnifica Comunità de Fiem per la valorisazion del lengaz ladin. Descheche à deschiarì te chela ocajion l procurador Bepe Detomas, da man de la Magnifica Comunità de Fiem l é ruà na proponeta enteressanta, per valorisèr e cognoscer duc i lengac del teritorie che chesta realtà la tol ite, donca l ladin, rejonà a Moena, l todesch rejonà a Trodena e ence i desvalives dialec di paijes de Fiem.

Dut l Consei é stat a una sun chesta cordanza e l moment ofizial per la sotescriver l é stat fissà per i 21 de firé, dì internazionèl del lengaz de la mère.

En vender ai 21 de firé da les 17.30 fora Ciavaleis i raprejentanc de la Comunitèdes di teritories touc ite fèsc donca la sotescrizion ofiziala de la cordanza, e te chesta ocajion tel Palaz de la Magnifica Comunità de Fiem vegn metù fora ence la doi bandieres: chela ladina e chela del Sudtirol.

La scontrèda sarà ence l’ocajion per rejonèr de lengac mendres con Angelica Bonelli, assistenta de enrescida te l’Università de Busan e per entener miec l segnificat de chesta cordanza travers l intervent de Pierangelo Giacomuzzi, che l é regolan de la Magnifica Comunità de Fiem per l paisc de Juan, olache l é enciasà, ma l é de naa ladina da Moena e l é ence l referent de la Magnifica a la cultura e a l’identità.

Su La Usc stampèda de en vender ai 21 de firé l ne conta rejons e obietives de chesta idea.

 (Lucia Gross)