La Usc di Ladins

Passa 700 mile ghesć y daimpró da 3,4 miliuns de sojornanzes: chëstes é les zifres turistiches prinzipales tla Val Badia, che pó ince por le 2024 ciaré zoruch a n ann turistich da record. I un damané do les statistiches pro les döes cooperatives turistiches dla valada (dal 1. de jená al 31 de dezëmber), olache i ves portun indô n valgönes coriosités, comun por comun. La chersciüda dles sojornanzes é stada dl 2,26% a livel de valada: le plü a La Val cun n plus dl 7%, le manco a San Martin cun n plus dl 0,73%. Ti trëi comuns dl’alta valada án despassé i 500 mile ghesć, tla bassa s’avijinëion ai 200 mile. Les sojornanzes á despassé i 2,5 miliuns tl’alta, y é cuaji 900 mile tla bassa.
La Val Badia á dagnora lauré en gran pert cun i ghesć taliagn y chël é dötaurela insciö. Ti ultims agn án indere odü na internazionalisaziun progressiva, che smendrësc de gre en gre la porcentuala taliana tles sojornanzes. Dl 2023 â les sojornanzes talianes ciamó fat fora le 50,3%; en chësc ann éseres jüdes zoruch al 46,67%. Les sojornanzes talianes é jüdes zoruch tratan le 2024 dl 4% tl’alta valada y dl 2% tla bassa. 

Chëstes y d’atres coriosités, zifres y statistiches, podëise ciafé t’La Usc di Ladins di 21 de forá, olache i un ince na tabela che mostra sciöche la porcentuala taliana s’á mudé tla ultima desëna de agn.  (pablo)