La Usc di Ladins

Sö Ruac a Badia viôl naota la familia dal cognom Fistil. Maria Sefl Fistil (1823–1896) â maridé dl 1858 Iojafat Pecei (1826 –1891) che ê rové da Calfosch jö Suracianins da San Ciascian; al lüch i dijôn »Chi de Tlara«. Sot l’imparadëssa Maria Teresa (1740–1780) êl gnü germanisé de nüsc cognoms. Fora de Pecëi él gnü Pitscheider. Un di mituns de Iojafat y Maria Fistill â inom Tone (1862–1933) y ê gnü patrun da Ruac; al laurâ le bindebó de lüch Ruac, al fajô pert dl cor de dlijia y ê sté 6 agn ombolt de Badia; dl 1893 âl maridé la jona Fefa Pescolderung (1872– 1947) de Jusciara. Nia manco che 16 mituns ái albü; valgügn viadus ê tosc jüs a cil sciöche agnui. Cun val’ 30 agn á Vijo maridé dl 1925 Maria Valentin da Fussé y ai á albü chisc mituns: Pepe, Angel, Tecla, Oswald, Giuvana, Angela, Tarejia y Maria.
Püc mëisc do la nasciüda dla plü picera, morîl la uma y lasciâ te na gran crusc l’om Vijo y i pici mituns. La plü vedla dles mitans ê Tecla de 11 agn, le möt plü vedl n’â 13. Tecla â messü brancé ite döt: lascé da jí a scora y sté a ciasa a se fistidié di fredesc y dles sorus. A scora podôra ma jí canche al gnô fat laurs de ciasa; dailó ára imparé da cují fora fios, da inzinzoré tovaies, da fá cialza, da cují a rampin; la jonina Tecla gnô daidada y istruida dales maestres Scolastica Pizzinini, Maria Pescol­derung de Scebio y Annamaria Campidel da Larcenëi.

Tecla ê dl 1951 jüda n bel de jö Milan a se chirí n post da fancela pro na familia por imparé la cujina taliana. Tla dlijia de Sant Ambroje, patrun dla diozeja de Milan, ti â n bel de le Signur baié ados: »Sce te m’ós bun, tol tüa crusc y ví do a me!« Ara s’â bëgn dé na gran spor­ düda y ne capî nia chësta cherdada fora de n aiet. Ara ne savô co s’un dí: ëra gní mognan y lascé döt te sü plü bi agn! Ara n’â 23. (Lois Trebo)

Deplü sön la vita dla mognan Tecla da Ruac podëise lí t’La Usc di 21 de forá