La Usc di Ladins

L’é stat la giornèdes FAI da d’uton, endrezèdes chisc ultimes egn dal Grop FAI de Fascia e Fiem, a ge fèr cognoscer a Gabriele Valentini “Mambo” da Ciampedel la bela scomenzadives de chesta fondazion che se cruzia de valorisèr e stravardèr l patrimonie artistich, culturèl e ambientèl de la Tèlia. L Grop FAI (Fondo Ambient Talian) era atif da egn forin Fiem, coordenà da Roberto Daprà, e del 2017 de gra a l’empegn de n grop de jent de Moena e de Fascia, soraldut de Annalisa Zorzi, l’é doventà apontin grop de Fascia e Fiem.

En ocajion de la giornèda FAI da d’uton a Pera del 2019 Gabriele Valentini, da semper pascionà de èrt, architetura e storia de noscia val, se à arvejinà a chest grop e l’an dò, ai 18 de otober del 2020, la giornèda FAI da d’uton te Fascia é stata endrezèda a Ciampedel ence de gra a sia colaborazion. 

En lunesc ai 28 de dezember l Grop FAI de Fascia e Fiem à endrezà la radunanza en videoconferenza a la prejenza de Luciana Depretis, referenta de la Delegazion FAI de Trent (de chela che l grop de Fascia e Fiem fèsc pèrt) e de la presidenta regionèla Giovanna degli Avancini.

Ajache Roberto Daprà aea jà fat a saer de no poder più portèr inant so empegn a cef del grop de Fascia e Fiem, Annalisa Zorzi, che aea tout sù l coordenament ti ultimes meisc, à portà dant l’inom de Gabriele Valentini, che l’é stat donca nominà coordenator.

Valentini se à dit stolz de chesta encèria, rengrazian per la fiduzia, l’à dit che segur l cognarà se dèr jù per cognoscer miec l FAI e dut chel che l fèsc ence fora de Fascia. Per chel che vèrda Fiem Valentini à dit che se aessa podù meter doi coordenadores, un per val, ma ajache chest no l’é pervedù l’à conscidrà che sarà l’ocajion per cognoscer miec ence la val vejina e che aboncont l fèsc gran cont sul didament di sozi da Fiem per l’endrez de la giornèdes FAI d’aisciuda, che tradizionalmenter vegn fates apontin forin Fiem.

L’à dit ence che l’é content de poder portèr inant chela azion de sensibilisazion per l stravardament e la valorisazion di lesc che testimoniea noscia èrt e cultura, e de voler spenjer e didèr la aministrazions e la istituzions de chest vers, descheche el à jà fat a livel personèl, per ejempie per fèr restaurèr l Stont de Ciampedel, e descheche l FAI de Fascia e Fiem aea fat per l depent del Rovisi te la gejiola de Someda. “Te noscia valèdes l’é amò n muie de lesc che merita de vegnir rencuré, valorisé e cognosciui ence fora dal paìsc – l’à dit - peisse per ejempie a la cortina de vera a Cianacei, a la Grotta de Vich, a desvalives depenc a fresch e capitìe che l’é fora per nesc paìjes. Portèr inant chisc temes desche FAI enveze che da singol sentadin arà de segur più forza e valuta.”

A Gabriele Valentini e a duc i volontadives del FAI ge fajon i miores augures de bon lurier.

 (Lucia Gross)