La Usc di Ladins

Federico Bellante, 30 egn, l é n joen da Moena che del 2015 à ciapà l brevet da pilot de elicoter. Do desvaliva esperienzes, del 2021 l é ruà tel Lazio, più avisa a Latina, desche pilot de elisocors.

L aon domanà fora per se fèr contèr de chest lurier segur fora de anter e de sia spetadives per l davegnir.

 
Federico, peste ne dir zeche de tie lurier e de coche t’es ruà tel Lazio?
Far chest laor völ dir inant che dut spetar la chiamada de le zentrale operative o de intervent se l é na domana de socors, aon no più che 5 menuc per se destacar da tera! Laore su mar, tera e Apenins donca na gran varietà de sort de intervent e chest l é dalbon percacent per la formazion. Son ruà tel Lazio a Latina per l fat che l model de elicoter dorà chigiò l é l medemo sun chel che son abilità giö, donca è abù ‘credic’ en più respet a autres sun chi che magari l era de besogn de investir per la formazion e le abilitazion le costa dalbon n mulge, da 40.000 fin a passa 70.000 euro per elicoter, depen da la sort.

Peste ne contèr na esperienza de n intervent a chel che te ès tout pèrt? Coluna emozions e sentimenc se proel?
De intervenc se n fasc tropes e n mulge desvalives l un dal auter, die demò che per chel che veje duc i dis, giö, la moto, no la toleré mai! Lascian da na man i aspec più despiajegoi, volesse contar enveze di sgoi chiec de not envers le isole Ponza e Ventotene, olache d’invern, zenza luna e magari valch nigola, no se tol più fora la linia del orizont e dut se mesceda anter ciel e mar, desché esser fac int dal scur e l é aló che se enten che ge völ se lasciar sun l elicoter travers i strumenc, e l om e la machina doventa na roba sola. Endana chisc sgoi no varde beleche mai da fora percheche vedesse demò negher ma tegne i ölges fisc sui strumenc per controlar che dut sie do che va desché pervedù e che l autopilot sie do che l fasc so laor.

Duta l'intervista a Federico Bellante su La Usc de papier de en vender ai 16 de jugn del 2023.

 (Cristina Marchetti)