La Usc di Ladins

Col 2024, l Zenter Antiviolenza de Trent, gestì dal Coordenament Femenes Trent e finanzià dal Servije Politiches sozièles de la Provinzia Autonoma de Trent, l à avert valguna senta periferica te la valèdes trentines con l obietif de didèr l azes a si servijes e esser più vejin a la eles che vif situazions de violenza. Enceben che l sie a Ciavaleis, chest servije raprejenta na neva ressorsa per la persones de Fascia, e chesta l é la rejon per chela che l Servije sozio-assistenzièl del Comun General de Fascia à volù ge dèr na lèrga de prejentazion al Portel Antiviolenza col envièr en particolèr i sogec formai e informai del teritorie che, te sia desvaliva encèries, pel se troèr a gestir situazions de femenes che cogn se tor dant n moment dalbon delicat e sfadious.

Ai 11 de mèrz passé, te sala de Consei del Comun General de Fascia, l era raprejentanc del mond de la sanità, di servijes educatives, de la aministrazions de comun, de la copratives sozièles e de la sociazions de volontariat, de la forzes del orden che à scutà con gran enteres e partezipazion la paroles de la relatores envièdes a meter dant sia esperienza e coche laora l Portel Antiviolenza de Fascia e Fiem.

De più su La Usc stampèda de en vender ai 21 de mèrz del 2025  (Cipriana Tomaselli)