La Usc di Ladins

Cuartet Tango X3
I Jëuni de Mujiga Gherdëina nvieia a chësc cunzert n juebia ai 20 de merz dala 20:00 tla Cësa di Cungresc
La grupa metuda su da Luca Degani (bandoneon/armonica), Leonardo Sapere (celo) y Giannantonio Mutto (tlavier) tl 2005 ulëssa purté inant l troi, che n à scumencià ani dant tl re­­pertoire dl Tango argentin. Si ar­chirida artistica se cunzentrea dantaldut sun opres dl cumponist Astor Piazzolla, ma ti ani ai slargià ora si nteres nce sun l Tango tlassich. Tres Rino Braia (contrabas) ie l trio deventà n cuartet. La Grupa lëura deberieda ai doi balarins Margarita Klurfan y Walter Cardozo. L program dla sëira dal titul »Barrio de tango« pieta de plu pec de Astor Piazzolla, Osvaldo Pugliese, Anselmo Aieta, Giannantonio Mutto, Agustin Bardi y Anibal Troilo.

»Tö es ci che te manges«
Chësc dit conesciü nes dij tan coliada che nosta alimentaziun é cun nosta sanité. Y chësc é ince le titul de n referat a Badia, ai 18 de merz
Na alimentaziun ecuilibrada, che se orientëia aladô di prinzips dla piramida dl’alimentaziun DGE, ne stimolëia nia ma la capazité mentala y dl corp, mo dëida ince da se stravardé da maraties y da se sté damí en general. Mo ci ó pa pordërt dí »mangé sann«? Le tru por rové a n’alimentaziun ecuilibrada pó te n pröm momënt dé l’impresciun da ester com­pliché, mo cun diretives tleres sciöche chëres dla piramida dl’alimentaziun, vëgnel scialdi plü saurí da ciafé n ecuiliber y da tigní na suravijiun. En mertesc ai 18 de merz dales 20:00 él tla Ciasa J. B. Runcher a Badia le referat »Tö es ci che te manges«, cun l’esperta de alimentaziun Sacha van Luyk. Organisaziun: Consëi de formaziun Badia.