La Usc di Ladins

N auter gran suzes per l portoi Munciogn sun Costabela. Ai 7 e 8 de mèrz la Monti Pallidi de Moena à endrezà la garejèdes de ski cross de Copa Europa e ence te chesta ocajions l park se à confermà ezelent per chesta sort de garejèdes, ence ai livie più auc.

Te duta doi la giornèdes la maor endesfida é stata anter i atlec de la Germania e de la Svizra, chesta ultima se à confermà la nazion venjidora en vender ai 7 con l prum post anter ic e ence anter eles con Lucas Richard e Anna Dietrich che à passà via respetivamenter Kilian Himmelsbach da la Germania e Alex Marro da la Svizra e anter eles Katrin Ofner da l’Austria e l’autra svizra Isabelle Zippert.

Anter i ladins troon l fascian Jannes Debertol 23° e l gherdener Daniel Moroder 28° e anter la eles la fascèna Rebecca Paoli se à classificà 20°, duc chenc é rué fin ai otaves de finèla. No se à calificà enveze Kristian Gabrielli e Nathalie Bernard.

La ge é jita miec al atlet da Ortijei Daniel Moroder en sabeda ajache l é stat bon de se vedagnèr l 10° post do se aer calificà fin ai chèrc de finèla. Bel resulat finèl ence per Rebecca Paoli da Pera, che la é stata ceta per beleche n an do che la se aea fat mèl proprio te la garejèdes de Copa Europa del an passà, che tinultima la é ruèda 18^; l’autra fascèna Nathalie Bernard se à classificà 21^ e sul medemo sciaier troon ence Jannes Debertol, l é restà fora enveze Kristian Gabrielli.

Per Fascia la sajon no se à amò serà su ajache ai 2 de oril semper sul portoi Munciogn l é en program i campionac taliegn assoluc de ski cross e dal prum ai 5 de oril l FassActive, en colaborazion con la Monti Pallidi e l Ski Team Fascia, endrezarà i campionac taliegn assoluc de schi, con la regia de la sozietà Gregn Evenc de Fascia e l’ApT. La garejèdes de discesa e superG sarà su La VolatA enveze la endesfides tecniches, se sarà amò neif, vegnarà fates sun Aloch, senó sun Lujia.

 (Monica Cigolla)