La Usc di Ladins

L Consei de Comun de Moena à lità dut a una la varianta al PRG di insediamenc storics de paisc aldò de la cordanza urbanistica ruèda ite da man de FPB Cassa de Fascia, Primier e Belun. La sentèda de Comun é stata chiamèda ite en mercol ai 5 de mèrz, prejenc beleche duc i conseieres, mencèa Nicola Zanoner e Alessandro Degiampietro de la maoranza e Riccardo Franceschetti de la mendranza. Te pecia paroles l é passà la varianta al PRG che perveit che la FPB Cassa bate ju l veie Hotel Corona e fae fora la neva senta de la Banca ge dajan na neva parbuda a duta la piaza de Sotegrava.

Dantfora l ombolt Alberto Kostner à spiegà en curt l iter de chesta cordanza e i vantajes publics che la porta, sotrissan che l Consei no é chiamà a valutèr l aspet architetonich del projet portà dant da la Cassa FPB ma demò chel urbanistich. »La Cassa à comprà ti ultimes egn l ex Hotel Corona e dute le pertinenze e la ge à domanà al Comun la possibilità de far na cordanza urbanistica per meter apost la veia strutura e la spersa dintornvia – à dit Kostner.

L é stat l architet de Comun Alberto Dallio che à spiegà tel detai la cordanza urbanistica moscian i volumes e la sperses che vegn tout ite con demolizions e neves frabicac che perveit per la Cassa n smaorament volumerich del 20% e l met de fèr n post per i auti sot tera. L architet à metù dant ence i vantajes economics de duta doi la pèrts ence se, l à spiegà, chesta sorts de proponetes che à n enteres publich, no semper pel dèr enteresc economics, ma l é da valutèr soraldut l’oportunità che califichea la proponeta.

Apontin na atenzion particolèra à domanà vèlch conseier che dant de litèr à volù palesèr sia declarazion de stima. La capogrop de la mendranza Manuela De Pellegrini à dit che i à valutà delvers duc i aspec de la varianta che met dant n intervent che Moena spetaa da temp. Annalisa Zorzi à metù l azent sul valor afetif, storich e artistich del Hotel Corona che »ence se l é n frabicat che no à n vincol de la Soraintendenza, l é l’anema del zenter de Moena. L conseier Luca Follador à dit che i vantajes per la comunanza de chesta operazion va sorafora l dan storich e emozional de perder l Hotel Corona che aessa podù benon far la fin de n muie de frabicac che é rué sul marcià imobiliar.

De più su La Usc stampèda de en vender ai 14 de mèrz del 2025  (Monica Cigolla)