La Usc di Ladins

Duc doi sul sciaier più aut del podie en Copa del Mond, tel medemo dì. No podea esser venta più bela per Miro e Flora Tabanelli, frèdes de 20 e 17 egn, studenc (l prum ti egn passé, la seconda amò ades) de la Scola Ladina de Fascia e del Ski College.

En jebia ai 13 de mèrz Tignes te la Franzia l é ruà per pruma la gran venta de Flora: la joena de 17 egn te chesta sajon no l'à mai lascià de maraveèr, garejèda do garejèda. Amò l meis passà la se aea jà arsegurà, pruma talièna e a na età tant joena, la Copa de crestel te sia pruma spezialità con doi ventes, trei medaes de arjent e una de bron tel big air, e do esser stata bona de ruèr pruma ence tel slopestyle a Stoneham, a Tignes la se à caparà ence la Copa generèla de park&pipe, resservèda a chi che rua sunsom te la desvaliva disciplines del freeski, ruan dedant a la atleta de cèsa Tess Ledeux.

La venta concostèda dapò da Miro, con sia pruma medaa de or en Copa del Mond (e la pruma te la storia per la Tèlia tel freeski), l'à più che radopià la legreza di doi frèdes. Per Miro chest l é stat l terzo podie de sia cariera, l secondo de chesta sajon. L é stat bon de passèr via l 90 te duc doi si sauc, ruan a ben 188.25 ponts complessives, dedant dal amedican Marc Forehand con 187.50 e dal neozelandeis Luca Harrington con 187.

Ades l'atenzion se ouc ai Mondièi, che i sarà te la Svizera, te la romancia San Murezzan, dai 19 ai 22 de mèrz per l slopestyle e dai 26 ai 29 per l big air. A tor pèrt a chisc mondièi per l schi freestyle l é en dut trei taliegn: apede a Flora e Miro ence Renè Monteleone de Gherdena.

Endèna i eies taca jà a vardèr più inant, a la Olimpiades che é sun usc, e olache da chisc doi frèdes mingol ence ladins se speton de autra marevees.  (Lucia Gross)