La Usc di Ladins

Dai 6 ai 22 de forá dl ann che vëgn gnarál tigní les Olimpiades da d’invern 2026, che ará de sües competiziuns ince a Cortina d’Ampëz y ite en Antholz, tan co relativamënter daimpró ala Val Badia. Propi porchël vëgnel ince fat laurs sön strada, sciöche chi da Armentarola sö cuntra Valparola. Por chësc evënt sportif unich se dejidrëion y s’aspeton sambëgn le gran aflus de jënt da piz a ciantun dl monn. Y sciöche an sá: sce valch é dër dejidré, spo costel tosc deplü. Chësc vel dantadöt por les localités che ospitëia les competiziuns, mo les localités vijines o nia dër dalunc ó forsc ince avëi süa sona. Do che le foliet "Die Neue Südtiroler Tageszeitung" á mostré le dëit sön les zifres astronomiches che vëgn ghirades por sté suranöt tl’Alta Val de Puster, unse ciaré ince chiló da nos, olache al é bele ejëmpli de strotöres che damana prisc che an mëss damperfora se sferié i edli.
Damperfora indere ti ciarunse ciamó a n ater aspet. La Cooperativa Turistica Alta Badia s’arjigna sambëgn ince al evënt, olache an fej danterater n laur de informaziun por ti lascé alsavëi a sü mëmbri co che ara é por transfer, azesc ai jüc, plazes da parché, chertes d’ingres y i.i. Tles ultimes edemes orôn indere ince savëi ci che i sozi á l’intenziun da fá cun les prenotaziuns y i prisc dles strotöres tratan chës döes edemes, porchël án mené fora n sondaje. Ala fin de forá êl danman i resultac. Al sondaje á respognü 279 patruns de strotöres d’albergaziun, olache le 51% afita ia apartamënc, le 26% á n hotel, le 20% n bed & breakfast y le 3% d’atres strotöres.

Co che i operadus dl turism ó se comporté cun i prisc y les prenotaziuns, podëise lí t’La Usc di Ladins di 21 de merz, olache i ves mostrun ince n valgönes ofertes dassënn strambes. Lapró unse baié cun l’ostí da San Ciascian Augusto Manco.  (pablo)