La Usc di Ladins

En gran pert él ëres y mituns, mo al é ince jënt atempada, berbesc y mëdes, che á messü lascé so daciasa por ti sciampé ales bombes, ala vera. L'ONU sciazëia che al é bele feter dui miliuns de muciadus sön le iade; n rü de jënt che rogor dal Ost al Vest tres i confins dla Polonia, dla Slovachia, dl'Ungheria, dla Moldavia y dla Romania.
Te nosta valada él pié ia aziuns de solidarieté. Insciö á la Schira Jonila da San Ciascian, en colaboraziun cun l'assoziaziun de volontariat da Porsenú »Helfende Hände«, metü da jí na aziun de racoiüda de spëisa, patüc por l'igiena personala, cutres y spënores. L'assoziaziun »Helfende Hände« laora bele da deplü agn incá adöm cun la lia miscionaria Christen Asociatia Misionara “El rămâne credincios” che á süa sënta a Botosani tla Romania. Chiló él rové y al röia tresfora adalerch n gröm de muciadus. L'edema da denant – sciöche al é scrit sön la plata Facebook de »Helfende Hände« - él bele condüt ia n camion cun madroc, spëisa, guant y d'ater patüc, che é ti é en pert ince gnü surandé ai profugs ucrains. Sëgn él gnü invié ia na aziun de solidarieté dedicada ala jënt che sciampa dal'Ucraina, aziun a chëra che ince la Schira Jonila da San Ciascian á tut pert, organisan na racoiüda de patüc da mangé, produc por l'igiena personala, sciöche p.ej. jafa, sciampo, pasta dai dënz, assorbënc, pezes, cutres y spënores. Le patüc é gnü dé jö la sabeda y la domënia pro paiun tl zënter dl paisc y canche i sun storc pro, la domënia sëra, unse podü odëi tan tröp che la jënt á bele sciafié da daidé tratan chisc pröms dui dis de racoiüda. »Al é rové adalerch n gröm de jënt cun patüc y spënores por i profugs – nes cunta l'animadëssa dla Schira Jonila Alma Frenademez, che dij inant: »Al é gnü condüt adalerch n pü' de döt, en gran pert él pezes por mituns, assorbënc por ëres, cutres, mo ince de vigni sort de patüc da mangé. Al é gnü jënt da döta la Val Badia y ince tröc sciori é storc pro y á contribuí. Sëgn gnará chësc patüc condüt cina tla Romania, olache al é rové chisc dis n gröm de muciadus«, stlüj jö l'animadëssa.

La racoiüda vá inant
L'aziun de racoiüda vá inant ince chisc dis, tres la Schira Jonila da San Ciascian y la Caritas da La Ila, tles porsones de Cristina Stampfer y Lissi Crazzolara. Indoman, jöbia ai 10 de merz dales 14:00 ales 17:00, pón dé jö patüc da mangé, patüc por l'igiena personala, cutres (nia guant!) a Cristina Stampfer, a La Ila te strada Ninz 74. La Schira Jonila da San Ciascian porta inant la aziun de racoiüda en domënia ai 13 de merz, pro paiun tl zënter dl paisc, dales dales 10:00 ales 12:00 y dales 16:30 ales 19:00.  (kp)