La Usc di Ladins

Chi che s’la spazirâ fora por Al Plan la incuntâ impó gonot. I baiun de Marianna o Marianne Lechner vëd. Trebo, la ëra che é romagnüda vitima en lönesc sëra dl bur’ inzidënt. Tratan che ara passâ ia la strada tles vijinanzes dl Hotel Monte Sella, ésera gnüda abinada da na jeep. Les ferides é stades tan pesoces che ara n’á baldi nia plü suravit. Marianne Lechner ê nasciüda l’ann 1950 a Redant. Dl 1969 s’âra maridé cun Pepi Trebo (Pepele de Cone da Val), romagnon vëdoa bele dl 2006. Ai ê jüs a s’aciasé a Al Plan, olache al é spo gnü frabiché pormez ala ciasa cuatiers por sciori, sot l’inom de "Residence Villa Toni". Iló á Marianna abité cina inultima, cina al bur’ fat sozedü en lönesc sëra.
Danter les ligrëzes dl tëmp lëde, â Marianne zënzater ince chëra da jí cun i compaejans en jita. Insciö êra gonot ala pert canche al ê da jí invalgó cun la Lia dai Crëp Mareo, y ara ê ince lapró canche le Seniorenclub Mareo se metô sön tru. Marianne lascia zoruch döes mitans y n möt, cun la parentela, a chi che i ti fajun ince nos les condolianzes plü sintides. Che Marianne pói palsé tla pêsc de Chël Bel Dî.  (pablo)