La Usc di Ladins

Tles ultimes edemes á val’ consumadus y consumadësses de nosta provinzia, dantadöt cliënc y cliëntes che ê n iade pro l’Enel, ciafé lëtres racomanades cun ghiranzes de paiamënt de bolëtes dla forza eletrica "vedles", che vá derevers de tröc agn y che n’é, sciöche al pé, nia gnüdes paiades.

Feter ala fin dl scrit de deplü plates metü jö por talian, vëgnel spo ince dé dant i referimënc dles bolëtes (numer y data dla bolëta) en chestiun. Al ne vëgn nia ma damané l’import debit mo al vëgn ince damané i fic d’intardiamënt por vigni ann.
I consulënc y les consulëntes dla ZCS s’á fat gran morvëia canche ai á odü l’ann d’emisciun dles fatures. Al é gnü mené fatures che vá derevers al 2016 y cinamai al 2010, cun lapró i fic d’intardiamënt cina al 2023.

Mo co é pa les regoles de prescriziun tl setur dl’energia?
Por les bolëtes dla forza eletrica vëgnel apliché da merz dl 2018 inant n tëmp de prescriziun arbassé de 2 agn. Porchël reverda les ghiranzes de paiamënt somes che é tomades en prescriziun. Le problem é che les ghiranzes de paiamënt é gnüdes menades por lëtra racomanada. Chësc sforza les porsones che á ciafé na te lëtra da se mëte ativamënter decuntra dijon che les somes é tomades en prescriziun.
I consulënc y les consulëntes dla ZCS dëida les porsones atocades formulé indortöra les respostes ai fornidus de energia. La ZCS ti á bele mené al fornidú nominé dessura na lëtra d’avertimënt cun chëra che al vëgn damané da lascé da fá insciö.

Consumadësses y consumadus che ciafa na lëtra cun na ghiranza de paiamënt dess contaté la ZCS (tel. 0471 975597 o e–mail: info@centroconsumatori.it) por ciafé aiüt da scrí eventualmënter na lëtra de reclamaziun. (Traduziun: Ofize Chestiuns linguistiches)