La Usc di Ladins

La fin de setemèna de evenc per recordèr i 10 egn da canche del 2014 l Istitut Cultural Ladin aea avert te Navalge a Moena la mostra »1914-1918 La Gran Vera« l é stat l’ocajion per la neva presidenta del ICL Tea Dezulian de se prejentèr per la pruma outa en publich te sia neva encèria.

Tea Dezulian la é da Cianacei, la é maestra de schi e fitacartieres e la é tel diretif tant de la Scola de Schi de Cianacei che de la Sociazion di Fitacartieres de Fascia. 

En lunesc ai 17 de jugn, giusta n meis do la data del decret del President de la Provinzia Maurizio Fugatti che aea nominà i 3 raprejentanc tel Consei de Aministrazion del Istitut designé dal Comun General e da la Region (Andy Rossi, Bernardino Chiocchetti e Marica Riz, apede a la revisora di conts Mirellla Spagnolli) la Jonta provinzièla con delibera nr 889 l’à integrà la nomines con la does che ge pervegn apontin a la PAT »do aer ejaminà la candidatures ruèdes ite a la PAT ti termins pervedui [...] e aer valutà en particolèr l curriculum vitae de la segnora Tea Dezulian e del segnor Francesco Dellantonio«. 

Aldò de chesta delibera Tea Dezulian é stata nominèda presidenta e la tol l post che ti ultimes 5 egn era stat corì da la avocata Lara Battisti, che al ultim l’à tout de retorn sia candidatura. Per Francesco Dellantonio, che era stat vizepresident del ICL ti ultimes 5 egn, l é stat fat la nomina de component del CdA subordenèda a la verifica de documenc pervedui.

Chest Consei resta en cèria fin a la fin de la legislatura provinzièla e l tol ite ence l president o n raprejentant de la Comiscion Culturèla, che la cognarà vegnir nominèda dal medemo CdA. 

I componenc se à jà binà en jebia ai 20 de jugn, a la prejenza de duc fora che del conseier Dellantonio, che no l à tout pèrt ajache no l era amò stat serà su l prozediment de verifica. 

De la nomina e de chesta pruma scontrèda aon rejonà diretamenter con la neva presidenta Tea Dezulian.

Podede lejer l'intervista su La Usc stampèda de en vender ai 28 de jugn.  (Lucia Gross)