La Usc di Ladins

Sön proposta dl’assessuria provinziala Ulli Mair, à la Junta Provinziala traté le tema dl aiüt tl caje de catastrofes naturales. Tl concret nen jôra da adaté y formulé plü avisa les normes che é bele. Danter l’ater él gnü fat fora che le fond por i aiüc d’emergënza pó sëgn gní tut ca ince por daidé ti caji che al é da trá jö frabiches desdrütes y desmandré le material. De chësc pó nen aprofité sides i Comuns che ince i privac, cun contribuc che pó rové cina al 70% di cosć reconesciüs. Lapró pó i contribuc gní aumentá dal 10 al 20% por cumpré o fá sö n cuatier nü, por curí i cosć por le terac y les infrastrotöres. Tl dagní podará spo i Comuns ti destiné a porsones atocades da catastrofes terac da frabiché bele scrit fora. Cina ciamó messâl gní assegné n terac da frabiché nü, tl vërt agricul.

Chëstes mudaziuns gnará portades ite tres la lege omnibus, che gnará tratada sëgn ai pröms de messé tl Consëi provinzial. Do l’aprovaziun, dess les mudaziuns ince brancé sön domandes bele presentades. "Cun chëstes mudaziuns garantiunse che les families atocades ciafes plü sostëgn da pert dla Provinzia, deache ti ultims agn él sté tres plü gonot che catastrofes naturales á danejé ciases d’abitaziun; n fenomen che i incuntarun baldi ince tl dagní", dij l’assessuria Mair. La Provinzia prevëiga sostëgns canche ciases d’abitaziun vëgn danejades da tremoroc, rogossies, smöies, plöieres, lovines o d’atri evënc naturai. Informaziuns plü menüdes ciafon a vigni moda ti ofizi dl frabiché alisire.