La Usc di Ladins

L é n gran vet te duta Fascia, ma soraldut te dut l mond del socors. Chesta net l é mencià Gino Comelli, n om che à segnà la storia del socors. Comelli l era n furlan, nasciù a Palmanova, ai 8 de mé de chest an l aea compì 70 egn. Pascionà de alpinism e crepes fin da joenet, l aea cernù de fèr l militèr te la Scola alpina de la Polizia a Moena, olache l era jit a fèr pèrt del Grop sportif Fiamme Oro, doventan menacrep e maester de schi. Del 1980 l é doventà socoritor e l é jit tel grop di Ciamorces. Del 1982 l é doventà Istrutor di Menacrepes e diesc egn do Istrutor del Socors e socoritor col jolier. L é stat a cef de la Stazion de Socors de la Val de Sora per ben 25 egn, dal 1990 al 2015, e del 1990 l é stat nominà president ence del Aiut Alpin Dolomites, che l à didà a meter en pe ensema con Raffael Kostner e Willy Costamoling. 

Te sia atività se dombra 42 egn de servije, 3000 miscions, 4000 ores de sgol.  Ma aldelà de chisc numeres emportanc, Comelli l era n muie stimà per sia gran competenza, umanità e desponibilità. Per chest sia departida à destrametù dut l socors de la valèdes ladines, ma ence chel trentin e nazionèl. L president del CNSAS del Trentin Walter Cainelli l à recordà con paroles pienes de stima sia capazità de vardèr inant, dijan che Comelli l à dat n gran contribut a fèr crescer l socors da mont, no demò te Fascia.

Paroles de vejinanza é ruèdes ence dai raprejentanc istituzionèi de val, anter chisc l conseier provinzièl Luca Guglielmi che l lo à recordà desche n pilèster fondamentèl del socors, che à salvà n muie de vites e che restarà semper n ejempie per duc nos.  (Lucia Gross)