La Usc di Ladins

L ultim Consei provinzièl per l assestament del bilanz à endò uzà fora contrasć anter l Comun General de Fascia e la Provinzia de Trent sul tem de la competenzes che, aldò de la Lege Provinzièla 3 del 2006 e de la L.P. nr 1 del 2010, che à aproà l Statut del CGF, ge pervegn al ent che raprejenta la mendranza ladina de Fascia, e di finanziamenc per poder les concretisèr. 

L recognosciment de duta la potenzialitèdes del Comun General l é n tem che ge stèsc particolarmenter a cher a Giuseppe Detomas, che jà dant de doventèr Procurador l se à dat ju percheche l CGF vegne recognosciù a livel costituzionèl, e ti egn passé l à seghità a chierir la strèdes per arjonjer chest travert.

Ai 25 de messèl, te la discuscion per l assestament del bilanz l conseier provinzièl del PD Andrea de Bertolini à portà dant n Orden del dì per domanèr che l Consei empegne la Jonta provinzièla a ge dèr al Comun  General de Fascia la ressorses che ge  permete de responer al compiment de sia funzions aministratives. L Odg ampò no l é stat aproà e chel che à soscedà maor marevea l é che l Conseier ladin Luca Guglielmi, che l era prejent, no l à votà. L Comun General à portà dant n recors straordenèr al President de la Republica contra la Provinzia autonoma de Trent, per zertèr la mencianza de adempiment de la lege.

De più su La Usc stampèda de en vender ai 2 de aost.  (Lucia Gross)