La Usc di Ladins

L é ruà a la 7^ edizion l Tornoi interladin Elite de hockey. Nasciù tel invern 2017/18, l é dapò jit inant vigni an (fora che del 2000, a cajon del Covid) tel meis de aost, per endrez de la sozietèdes de hockey de Fascia, Gherdëina e Cortina e col patrozinie de l’Union Generela di Ladins dla Dolomites. Na bela ocajion per ge dèr l met a la trei squadres maores de se confrontèr e se cognoscer, fèr mingol de arcedament dant dal scomenz del campionat e ence de ge sporjer n spetacol sportif ai ghesć che te chest meis rua te noscia valèdes en feries.

Do la pruma edizion, venta dal Gherdëina, a concostèr l ejit mior l é stat l Cortina, ruà prum del 2018, del 2019 e ence l an passà, enveze l Fascia se à vadagnà l titol del 2021 e del 2022.

Chest an l tornoi l é peà via en mèrtesc ai 13 de aost con la partida a Selva anter Gherdëina e Cortina che se à serà su col resultat de 4 a 0 per l Gherdëina. En vender ai 16 da les 20:45 l confront sarà amò anter la doi squadres de Cortina e Gherdëina e i ampezegn proarà a se tor la reventa su la giacia de cèsa. Dapò l Tornoi jirà inant en mèrtesc ai 20 ta Dèlba con la partida anter Fascia e Gherdëina, en jebia ai 22 vin Ampez jiarà l Cortina contra l Fascia e en mèrtesc ai 27 ta Dèlba sarà l Fascia su la giacia de cèsa a tor dant l Cortina. L’ultima partida de chesta edizion del Tornoi interladin Elite de hockey sarà en vender ai 30 de aost a Selva, olache l Gherdëina tolarà dant l Fascia. A la fin de chesta partida sarà la premiazions  (lg)