La Usc di Ladins

La rassegna »Ispirazions d’istà«, endrezèda da la Comiscion per la cultura de la parochies de Fascia e ruèda a la 15^ edizion, ne à usà oramai a scontrèdes e scomenzadives che chier, ben segur, la varietà di temes e la competenza di relatores, ma zenza se lascèr trèr ite massa da la modes, dai inomes de nonzech e dal gust semper maor per i selfie.

Un di ultimes apuntamenc, stat ai 9 de aost te La Gran Ciasa a Soraga, à sperimentà na formula neva: doi persones cognosciudes per sia esperienza e competenza, ma ence doi amisc, é stac envié a se confrontèr te n dialogh, zenza moderazion, sul tem de la politica desche servije.

I doi protagonisć de la sera l era Lorenzo Dellai, stat president de la PAT e parlamentar, e Giovanni Grasso, portaousc del president Mattarella, scritor e studious de storia contemporana e del mond catolich.

A ge dèr l benvegnù e i prumes stimoi l é stat l president de la medema Comiscion cultura de la parochies, l storich fascian Cesare Bernard. L à rejonà del conzet de politica desche forma più auta de ciarità, tout ca ence da Papa Paul VI, e del apel ai cristiegn che i se dae ju te la politica, uzà fora più outes ence te encicliches, per ejempie te la »Gaudium et spes«, n empegn che se pel declinèr te una soula parola: ‘servije’. 

De più su La Usc stampèda de en vender ai 16 de aost.  (Lucia Gross)