La Usc di Ladins

L capo miscion Stefano Sozza à fat a saer proprio chisc dis passé che i é stac bogn de jir ite a Gaza. Ence el rejona de na situazion critica, da no poder nience se fegurèr, con la popolazion che no é più bona de tegnir fora, con besegnes de ogne sort, zenza èga e nia da magnèr, bec che cogn viver per strèda anter i frabicac dessaté e con gran pericol sanitèr.

Ti meisc passé, spetan l’autorisazion definitiva a poder ite te la Striscia, Emergency l’à lurà per definir l projet e meter a jir n coordenament con la agenzia de la Nazions Unides e etres partner sul teritorie.

Ades i à podù jir ite per verjer n pont sanitèr e ge portèr n prum aiut, stabilisazion de emergenzes mediches e chirurgiches e trasferiment te ospedèi, assistenza medica e chirurgica de basa per gregn e picoi e autra ativitèdes de ambulatorie.

Ence con duta l’esperienza de Emergency lurèr a Gaza l é senester, l é de gran limitazions de azes per la organisazions umanitères, l é l pericol de condizions de segureza deboles e l spazie umanitèr garantì l é semper mender. 

Ai 26 de aost zirca 305 chilometres cadrac, beleche l 85% del teritorie de la Striscia de Gaza, l é sot orden de evacuazion e l’area umanitèra declarèda da Israel a al-Mawasi la é stata smendrèda dai 58,9 chilometres cadrac del scomenz del an a zirca 46 km2. Te la pruma metà de aost l é stat neà da la autorità de Israel 68 miscions umanitères.

La popolazion de Gaza no la pel seghitèr a viver te chesta condizions desumanes, disc Emergency: ge vel fermèr l fech sobito per poder lascèr ite i didamenc umanitères.

Chi che vel n saer de più o sostegnir l’atività de Emergency a Gaza i pel jir sul sit de Emergency a chest link: https://www.emergency.it/progetti/gaza-assistenza-sanitaria/


 (LG)