La Usc di Ladins

En mertesc ai 17 de setëmber él gnü metü dant i inoms dles trëi porsones che vá tla seleziun finala por la nominaziun a intendënta o intendënt ales scores ladines dl Südtirol. Ara se trata de Maria Kostner – direturia dl Ciamp Pedagogich dla direziun dles scores y scolines ladines, Mathias Stuflesser – diretur dla repartiziun ladina y Heinrich (Heinz) Videsott – diretur dla direziun dles scores d’Al Plan. Al é la Junta Provinziala che fej fora che che surantolará la inciaria, aladô dles propostes metüdes dant. Lapró ól ester na aldiziun dl Ministere dla Istruziun.
Le termo por dé jö la candidatöra ê gnü fissé por i 23 de agost. Indöt él gnü ite cin’ candidatöres: dlungia les trëi propostes êl ciamó chëra dl gherdëna David Lardschneider y dla marôra Ingeborg Dejaco. Un de chisc ultims á ala fin ciamó trat zoruch süa candidatöra. Ala fin á i nü mëmbri dla consulta chirí fora i trëi inoms suradic, olache Heinz Videsott á ciafé 7 usc, Maria Kostner 3 y Mathias Stuflesser öna.  (pablo)