La Usc di Ladins

Plu de 700 apasciunei y apasciunedes d'ert y truepa autoriteies fòvel da udëi pra la giaurida dl'Unika, n mierculdi sëira dl'ena passeda, ai 11 de setëmber. Cater dis alalongia, dai 12 ai 15 de setëmber, àn abù la puscibltà de jì a ti cialé a chësta mostra, pra chëla che l à fat pea chëst iede duc i 42 cumëmbri, zënza ezezion, n ucajion dl'edizion numer trënta. »Trënt'ani ie n tëmp lonch, purempò fossa trënt'ani massa curc per purté l'Unika ulache la ie śën. Gherdëina à na storia scialdi plu longia tl ciamp dl artejanat artistich. Ma l'Unika ne ie nia tlo per cialé de reviers o ti cialé al daunì, ma per festejé la criatività y la varietà«, nscila Matthias Kostner, presidënt dl'Unika da n valgun ani incà. Pra la giaurida à l ambolt de Urtijëi Tobia Moroder tëut la parola a inuem de duc i ambolc dla valeda y à lecurdà che la storia de Gherdëina va a una cun chëla dl ziplé: »Cie fossa pa Gherdëina zënza artejanat artistich? Son duc chersciui su a cuntat cun l'ert«. L à nce lecurdà che n à iust stlut ju per tëmp i lëures per ressané la strutura dal tennis a Runcadic che n à messù adaté ala normatives de segurëza y de melde fuech scrites dant y dantaldut nce cuncé l tët che stravova, per na soma de belau n milion de euro ndut.

Nathalie Stuffer

Deplù n con' dl'Unika pudëis liejer tl'edizion nueva de n vënderdi ai 20 de setëmber.