La Usc di Ladins

Sëgn che les temperatöres vëgn plü frësches, vá le pinsier ince plan plan cuntra l’invern. Por le comprensor dl Dolomiti Superski sarál la sajun dai schi numera 50, che dess pié ia ofizialmënter ai 30 de novëmber. En chël de dess daurí tla Ladinia i pröms lifc dl comprensor da Cortina d’Ampëz y chël de Plan de Corones. Cun i 5 de dezëmber él preodü da daurí ince ti atri raiuns, sciöche Alta Badia, Gherdëna-Munt de Suc y Fascia-Ciareja. La sajun jará spo inant le plü dî a Cortina, cina al 1. de ma 2025, sön Plan de Corones cina ai 21 d’aurí y ti atri raiuns ladins cina ai 6 d’aurí.

Por festejé le iubilé de mez secul, án orü porté ite ince valgünes promoziuns. Cun la sajun 2024/25 y tles sajuns che vëgn, gnarál slarié le rabat "junior" dl 30% sön le prisc dles chertes dl de y de plü dis a düc chi sot i 18 agn. Denant êl cina 16 agn. "I un orü tó chësta dezijiun tl tëmp por tó ite ciamó deplü les generaziuns nöies, por les apascioné al sport dai schi da jogn insö y insciö renforzé la fedelté de nosta clientela dl dagní", dij Andy Varallo, presidënt dl Dolomiti Superski. D’atres propostes vantajoses por schipas sajonai gnará ince pitades da valgügn consorc de valada.

Novités él ince por ci che reverda i investimënc dles sozietés te implanc nüs, olache i cumpedun sö chi ti raiuns che atoca la Ladinia. Sön Plan de Corones, dala pert di valdaores, vëgnel sostituí le lift "Plateau", cun n implant a scagns da 8 posć (denant 4); a Corvara ciafarán le lift a scagns nü "Braia Fraida" da 6 posć, respet ai 4 da denant; te Gherdëna vëgnel baraté fora le skilift "Palmer", te Fascia vëgnel sostituí le skilift "Golf 1" cun n implant nü dla medema sort; tl raiun da Reba-Marmolada él la novité dl lift a scagns da 6 posć "Piani di Ornella-Ju de Padon", che tol ite le post dl lift a scagns da 2 posć.