La Usc di Ladins

En doman ai 21 de setëmber sarál San Matio, che é pordërt le de incër chël che i paurs vëgn de munt cun i tiers. En chësc ann á indere döt messü jí plü snel. Plü co n "gní de munt", él feter sté n "sciampé de munt". La gauja stá te öna dles gran corëtes dl tëmp, che i un albü anter le mercui y la jöbia ai 12 y 13 de setëmber. Le mercui podôn ince te munt ciamó rodé en braia cörta y maneghins, la jöbia sëra êl ince jö ales basses da se trá surajö na buna joca. Al ê gnü dit danfora che al foss gnü impröma la plöia, spo la nëi y dedô n gran vënt. Insciö ésera ince stada. Sön Senes publicâ l’ostí Erich Palfrader n video dla terassa de süa ütia cun bun 30 cm de nëi frësca. Dailó ne n’ê la maiú pert di tiers nia plü lassö, deache paurs y famëis á tut la dezijiun da jí a se do o da paré jö i tiers. Sides sön les munts de Fanes, che ince sön Senes, Munt de Senes y Fodara Vedla án abiné adöm düc i tiers y i á paré jö tla Val dai Tamersc, olache ai podará ciamó pascenté zacotan de dis. Ince dailó êl le vëndres da doman na cutra blancia de val’ zentrimetri, olache la mansonara messâ foré tl terac morjel por rové proerba, o zënza jí a la munché sot chi lëgns da odlina, olache la nëi n’â nia sciafié da s’abiné sö plü che intant. Ciamó en chël de s’un é la maiú pert delegada. Atramënter án fat sön la munt de Fojedöra.

Co che ara é jüda, ves cuntunse t’La Usc di 20 de setëmber, olache i un baié cun i maurighi, sce an á albü da sćiampí cun i lus  (pablo)