La Usc di Ladins

Al proiet, che vëgn metü a jí dala Consulta Ladina dl Comun da Balsan en colaboraziun cun le Comun da Balsan, l’Intendënza ladina cun le Ciamp pedagogich, le Museum Ladin Ciastel de Tor, le Museum de Gherdëina, le Museum Ladin de Fascia y la Comunanza ladina da Balsan, á tut pert passa 600 scolars y scolares, che á imparé a conësce deplü aspec dla cultura, dl lingaz ladin y ciamps desvalis dla realté ladina sciöche realté de mendranza te Südtirol.

Le proiet é metü adöm da döes perts, de chëres che la pröma vëgn fata tles scores che se scrí ite cun la presënza de na esperta dla cultura ladina y la secunda cun na jita tematica tles valades ladines, o da d’aisciöda y da d’altonn. Susy Rottonara dl Ciamp Pedagogich á porté dant tles scores i aspec fondamentai dla cultura, dla realté ladina y dl model scolastich ladin adöm cun na introduziun al lingaz ladin por imparé n valgönes parores y espresciuns ladines fondamentales, aladô di liví de scora desvalis. La partezipaziun ativa da pert di scolars y dles scolares é spo plü gonot jüda inant te classa cun proiec multimediai de aprofondimënt sön tematiches desvalies che á da fá cun la cultura y la realté ladina.
Al é gnü a s’al dé n focus particolar sön la tematica dles liëndes ladines tl cheder dl proiet de candidatöra dles liëndes ladines sciöche patrimone imaterial Unesco, por sensibilisé sön la valüta de chësc avëi cultural ince fora dles valades ladines.

Deplü podarëise lí t’La Usc stampada