La Usc di Ladins

“The Rise of the Fleeting Moment”
L’assenscion dl mumënt che mucia sotora – la fotografies de Giancarlo Lamonaca tl Tublà da Nives te Sëlva
La fotografia ie n strumënt ideel per mustré su la sfumadures dl tëmp, si fazion, si cunseguënzes, ma nce per mustré su si premisses. Nia l dant y l do, ma l co y percië, se cuncretisea te n purvé assurd y puech puscibl de tenì fërm l prejënt.
La ntervenzions de Giancarlo Lamonaca reprejentea dantaldut na ndesfida al’idea de na realtà che ie laite tl cunzet de fotografia y gëura fronc nueves de dialogh cun chël che ie. L se trata de azions fisiches y simboliches, che spidlea la faszinazion de cie che ie mesun capì te deplù manieres.
Giancarlo Lamonaca ie nasciù t’Ampëz y à studià ert y depënjer dla Cademia di Belle Arti de Bologna y tla HDK Berlin. Ël viv y lëura a Vahrn. La giaurida dla mostra ie n sada, ai 19 de utober, dala 17.00 tl Tublà da Nives te Sëlva. La ntroduzion ie de Emanuel Valentin. L vën servì n buffet ladin. La mostra resta davierta nchin ai 10 de nuvëmber uni di ora dl lunesc dala 15.00 ala 18.00.

Mostra Zone d’ombra
L Circolo–Lia Mostra d’Ert

• 
•  

View the embedded image gallery online at:
https://www.lausc.it/manifestazions-y-evenc/28125-manifestazions-atuales-speziales#sigProIdb3f4d04752

nvieia a unì a ti cialé ala mostra de Johanna Fink y Michele Azzalini. La giaurida sarà ai 25 de utober dala 20:00 tl self dla mostres dla Lia Mostra d’Ert
Zone d’Ombra ie na reflescion sun la perzezion, doi nrescides desferëntes per mustré n imaginer ascundù. La mostra va ala descuvierta de n microcosm, n sotfonz che ie mé da udëi sce n ti va permez, sce n ti va daujin al’opra, metan a fuech cie che ne ie suvënz nia saurì da sentì, cie che ti mucia al uedl. I doi artisć prejënta lëures che mostra su si nteres de viers de chësc mond ascundù tres la criazion de na cuntreda che semea fërma tl tëmp.
Michele Azzalini (Vittorio Veneto 1996) à fat l curs de scultura pra l’Accademia di Belle Arti de Venezia. Johanna Fink (Bulsan 1998) fej l’Accademia di Belle Arti de Viena tla tlas de Scultura de Julian Göthe.
La mostra resterà da udëi nchin ai 17 de nuvëmber: merdi–dumënia, 16:00-19:00 y de sada y dumënia nce danmesdi, 10:00–12:00.

La Scola »Le Muse e le Dolomiti« aur si ujes
Te la senta de Moena via per dut l meis de otober vegn fat lezions de proa debant per i bec dai 6 egn en su
La Scola Interregionèla per emparèr a ciantèr e fèr teater per bec e joegn dai 6 egn en su, proponeta da la Sociazion »Le Muse e le Dolomiti«, la é ativa ence te Fascia. Te sia senta a Moena, te sala Simonin Maza de la scoles, olache l é a la leta ence n pianofort, la maestra Oda Zoe Hochscheid tol dant duc i bec e i joegn che volessa emparèr a ciantèr e fèr teater. Via per dut l meis de otober la scola met dant lezions de proa debant duc i mèrtesc domesdì. No l é besegn de aer cognoscenzes musicales: pel proèr duc chenc. La musega la é emportanta per la crescimonia di bec, n ambient musical stimolant l à efec positives sul svilup emotif e cognitif di bec e joegn. La Scola Interregionèla se met dant de fèr crescer artisticamenter e umanamenter i studenc e la garantesc amò apede ence momenc de sozialità e de spas. I resultac l é: se cognoscer miec anter bec de la valèdes de la Dolomites e fèr nascer de neva amicizies e colaborazions.
Per info www.musedolomiti.it o chiamèr la presidenta Oda Zoe Hochscheid al numer de telefon 342 9147711.

Mostra de vaces frijes
Ai 26 d’otober él tla hala dl marcé a San Laurënz, na mostra de tiers frisc »Pustertaler«, cun presentaziun, valutaziun, lotaria y lizita
Chësta mostra vëgn a s’al dé ma vigni 10 agn y sëgn ésera indô tan inant. En sabeda ai 26 d’otober vëgnel mostré i plü bi tiers (videles, manses, vaces y manc) de chësta raza dl post,  autoctona y da na gran tradiziun. Ara fej pert dl’arpejun culturala locala che se mirita da gní mantignida. La mostra vëgn daurida dales 9:20 y dales 9:30 mët man la presentaziun y valutaziun di tiers. La finala cun premiaziun di plü bi tiers é dales 13:30. Le program vá inant dales 15:00 cun l’estraziun dla lotaria, olache an pó davagné sciöche pröm pest na mansa frija plëna. Dales 16:00 gnarál ciamó metü a jí na lizita de 12 de chisc armënc. Chësc de vëgnel pité spezialités da mangé cun cern de chisc tiers.

Conzert sacral cun cater cors
En domënia, ai 20 d’otober dales 16:00, te dlijia da San Martin de Tor
Sciöche conclujiun dla Edema dla Fede, vëgnel metü a jí n conzert te dlijia da San Martin de Tor en domënia ai 20.10.2024 dales 16:00. Al cianta i cors de dlijia da Corvara, La Ila, La Val y San Martin de Tor. Düc é bel inviá, entrada de bona man!

Ensemble Desiderio & Rosalía Gómez Lasheras
I Jëuni de Mujiga de Gherdëina nvieia a chësc cunzert, n juebia ai 24 de utober dala 20:00 tla Cësa di Cungresc a Urtijëi
Mujiga virtuosa y che toca–nscila se prejënta l Ensemble Desiderio, n culetif metù su tl 2017 da Agnes Mayr (flaut), Miriam Kofler (fagot) y David Fliri (corn). I artisć y la artistes che lëura a livel nternaziunel porta dant truep de biei pec de mujiga da camera, che l se paia a scuté su.
Rosalía Gómez Lasheras ie nasciuda tl 1994 a Santiago de Compostela y à mparà a suné l tlavier da A.Weiss und C. Martínez Mehner, l cembalo y tlavier (Hammerklavier) tla Schola Cantorum Basiliensis. Sun l program dla sëira iel pec de Leoš Janáček (1854 – 1928), Amy Beach (1860-1944), Ernö Dohnányi (1877-1960). Duc y dutes ie nviei a unì a scuté su. L sarà mesun cumpré na cherta soziela che vel per duc 10 i cunzerc. Adulc: 90,00 €, Jëuni da 14 ai 26 ani: 60,00 €. Priesc singul: Adulc: 18,00 €; jëuni da 14 ai 26 ani: 12,00 €.

Liber nü de poesies »Le fi dl plü – Il filo del più«
Presentaziun en vëndres ai 18 d’otober 2024, dales 18:00, tla Ciasa de cultura (Salf panoramich) a

• 
•  

View the embedded image gallery online at:
https://www.lausc.it/manifestazions-y-evenc/28125-manifestazions-atuales-speziales#sigProIdb3f4d04752

La Ila
L’EPL–Ert por i Ladins inviëia ala presentaziun dla racoiüda de poesies de Silvia Liotto dal titul »Le fi dl plü – Il filo del più«, cun poesies metüdes jö ti dui lingac ladin y talian. Söl program él letöres fora dal liber y n dialogh dla esperta leterara Isabella Ties cun l’auturia.
L’auturia Silvia Liotto á pié do en chësc ann le pröm post al »Pest de poesies Angelo Trebo«, la diejima ediziun dl concurs lirich trienal y interladin.

Na vita ntiera da sëur
La KVW de Urtijëi/Runcadic mët a jì na sëira cun Norbert Kostner da Pinëi, cuech renumà tla Tailandia
N vënderdi ai 25 de utober 2024 dala 8 da sëira, te sala de calonia a Urtijëi, saràl na sëira cun Norbert Kostner da Pinëi. Ël se n fova jit bele da jëunn da Gherdëina per ti jì do a si lëur da cuech.
Ntan la sëira nes cunterà l chef renumà, che ie śën n pension, nia mé de si cariera straurdinera tla Tailandia, ulache l à laurà per passa carant’ani tl Hotel Mandarin Oriental a Bangkok, ma nce de si esperienzes y filosofia de vita y vel’ blòta ntraunida. La moderazion dl sëira sëurantol Oswald Delago.

Scurité, sorëdl y natöra
I Consëis de formaziun de Mareo inviëia ala Edema dla sanité, che vá en chësc ann dai 21 d’otober ai 25 d’otober 2024
L’Edema dla sanité te Mareo vëgn portada da plü agn incá dai trëi Consëis de formaziun de Mareo y dala Crusc Blancia, seziun d’Al Plan. Le program de chësta ediziun numer 21

Scurité tl’anima
I temesc é ampli y soc y vëgn aprofondis te cin sëres partides sö danter Al Plan, La Pli y Rina. L’Edema mët man en lönesc ai 21 d’otober dales 20:00 a Al Plan tl Salf dla Cassa Raiffeisen cun na mësa torona menada da Diego Clara sot le moto »Scurité tl’anima – Depresciun, i orun nen baié«. Al tol pert le psicologh Edmund Senoner y Franz Trebo che cunta de sües esperiënzes de vita. La serada vëgn organisada en colaboraziun cun l’uniun Lichtung/Girasole.

Autosufiziënza cun l’urt de ciasa
Te chësta serada en mertesc ai 22 d’otober dales 20:00 a La Pli tl Salf dles manifestaziuns portará dant le referënt Georg Trebo (ortolan y comerziant diret) sües esperiënzes por avëi na bona racoiüda y nes dará consëis de coche i podun ester le plü che ara vá autosufiziënc tratan dötes les sajuns dl ann, en particolar te chëres plü frëides.

S’la rí fej bun
En mercui ai 23 d’otober dales 20:00 saral a Rina tl Salf dles mmanifestaziuns söl program na incuntada cun la maestra de yoga y esperta de feng-shui Mantari Veronika Eschgfeller che baiará söla posivité y söl s’la rí. Rí é la miú medejina!
Le yoga dl s’la rí é nasciü dl 1995 ofizialmënter, y al anüza na tecnica visiva che funzionëia por emané energia positiva.

Le malan tl alcol
»Tles ciafes dl alcol – vire cun y dlungia la dependënza« é le titul de na serada de discusciun menada da Diego Clara en jöbia ai 24 d’otober dales 20:00 a Al Plan tl Salf dla Cassa Raiffeisen. Al sará ala pert le psicologh Edmund Senoner y Hubert Pizzinini y Paul Pedevilla che cuntará de sües esperiënzes. La serada se desfira en colaboraziun cun l’APCAT Südtirol.

Le bun dla mil
L’espert dla natöra y dles es Erich Larcher gnará en vëndres ai 25 d’otober dales 20:00 a La Pli tl Salf dles manifestaziuns por baié di efec positifs dla mil.