La Usc di Ladins

Beleche duc i é a una: l nef ospedèl de Ciavaleis cognarà vegnir fat su te n post da poder ruèr apede sorì, tant da la jent che dal personal. Miec se vejin a un di paijes più gregn de Fiem e miec amò tel raion olache l é jà l veie ospedèl. L cognarà esser integrà con l’autra strutures sanitères del teritorie desche per ejempie la Cèses de la Sanità de Sèn Jan e Pardac e la Cèses de Paussa e con la vita de la valèdes per garantir na conescion forta con l sistem sozio-sanitarie del teritorie e sia funzion essenzièla de coordenament e de integrazion. Amò apede i ordegn profescionèi e i ambientalisć domana ence che no vegne durà teren vert.
L é chesta la pruma indicazions regoetes endèna la 6 scontrèdes con i portadores de enteres che ti ultimes doi meisc à tout dant i criteries per troèr n lech adatà per l nef ospedèl e per scutèr la idees e la prioritèdes de la aministrazions de la doi valèdes.
I ejic de chisc desć de lurier é stac porté dant en mèrtesc ai 28 de jené.
Ades l prozes partezipatif va inant con  trei scontrèdes: en lunesc ai 10 de firé al Palacongresc de Ciavaleis, en mèrtesc ai 11 al Teater de Pardac e en mercol ai 12 te la sala Bavarese de Tieser con scomenz da les 20:15. A ogne scontrèda pel tor pèrt no più che 100 persones, ge vel se scriver ite sul sito de la Provinzia de Trent, olache l é stat publicà ence la proponetes ruèdes ite enscin ades da jent e sociazions. Duc pel manèr ite sia osservazions, analises e proponetes dant dai 28 de firé.

De più su La Usc stampèda de en vender ai 7 de firé.


 (Monica Cigolla)