La Usc di Ladins

Noza da paur a Badia
Ai 11 de forá dales 21:00 él a Badia la »Noza da paur«, na manifestaziun por tigní vies les tradiziuns da n iade
Na manifestaziun liada ala vita da zacan é la »Noza da Paur«, che vëgn metüda a jí en mertesc ai 11 de forá dales 21:00 a Badia. Cun chësta manifestaziun ón ti porté dant ai plü jogn y ai sciori di paisc les tradiziuns da paur. La defilada passa fora por le zënter de San Linert, y dan la ciasa »Croce Bianca« sarál le gran past da noza cun les spezialités ladines y olache la Böhmische de Badia tol ite i novic. Sciöche da tradiziun, podarán odëi la liösa cun la nücia, sü geniturs, le mënanücia y la ciamarita – la tota da bato. Sön n’atra liösa sarál le nüc cun sü geniturs y le mënanüc. A pe o sön deplü liöses sarál i atri familiars, amisc y vijins. Al ne manciará nia val’ grup musical, che abelësc la noza cun i orghi da man y i guanc tradizionai.
Tröpes é les tradiziuns liades ala noza da paur, che vëgn portades dant en chësta ocajiun sciöche le jí cun la cioura ai fredesc y sorus plü vedli di nüc che é ciamó da maridé, i ciapí da plömes y ciüfs de scaia vistis dai jogn inviá a noza, le costüm tradizional y la gherlanda cun ciüfs blanc da cëra dla novicia y la daurida dl bal da pert dl pröm śonsel y dla pröma śonsela.
Al vëgn rengrazié le Comun de Badia y sü lauranc, la polizia de Comun, i Stödafüch de Badia, la Crusc Blancia Alta Badia, la sozieté di implanc da La Crusc, l’alberch San Leonardo, la conditoria I Dolci di Ricky, la Uniun di Ostis de Badia, l’Uniun di paurs de Badia, l’Uniun di Ciavai Haflinger y l’Uni­un di Ciavai Norics dla Val Badia y düc chi che fej pert ala defilada, che á metü a despo­siziun i guanc o che se crüzia por le bun garaté dla manifestaziun, organisada dala Cooperativa Turistica Alta Badia.

Cuartet de archëc - teater a S. Cristina
La grupa Teater S. Cristina nvieia al pez da rì »Streichquartett« de Szöke Szakàll. Regia y traduzion tl gherdëina de Willy Runggaldier
L diretëur de na gran firma uel fé l majer afar de si vita y nvieia perchël si tlient da d’ël a cësa, ulache l uel ti pité n bel cunzert y n bon buffet. L problem ie abiné i musicontri, che dëssa duc vester de si firma. Si vize ti juda, ma zënza se cruzie tan boni che i ie de suné...
La premiera ie n juebia ai 20 de fauré dala 20:30 tl self de Chemun a S. Cristina. Daldò saràl mo cin’ reprejentazions–for tl self de Chemun: ai 23.02. dala 17:00, ai 25.02. y ai 28.02. dala 20.30, ai 02.03. dala 17:00 y ai 03.03. dala 20.30.
Atëures: Diretëur Schwarz - Bruno Se­noner, Bella - Mary Kerschbamer, Hanni - Cornelia Demetz, Tini - Verena Insam, Mayer 1 - Samuel Runggaldier, Mayer 2 - Matthias Runggaldier, Müller - Moritz Ploner, Dorn - Hans Peter Runggaldier, Bera Sommer - Aaron Runggaldier. L dij ite: Silvia Senoner.
Chertes danora pòssen apusté cherdan su Paola Stuffer al 339 3399266.

»Intreciades«
Mostra dles artistes dla Val Badia tla Lanserhaus a Eppan. Daurida dla mostra en sabeda ai 22 de forá 2025 dales 18:00, la mostra sará da odëi cina ai 9 de merz 2025
Cun la curaziun de Jahel Beer mët fora sües operes les nü artistes de liam cun la Val Badia y l’EPL-Ert por i Ladins Silvia Baccanti, Youlee Ku, Maria Pezzedi, Irina Tavella, Irma Irsara, Gaia Lionello, Cristinarosa Pizzinini, Ursula Tavella y Jutta Valentini. I orars de daurida dlamostra é: dal lönesc al vëndres dales 16:00 ales 19:00, y sabeda y domënia dales 10:00 ales 12:00 y dales 16:00 ales 19:00. La vernissaja é söl program ai 22 de forá dales 18:00 cun salüt y introduziun, y musiga de Laura Willeit.

Sport, ativités y devertimënt tratan l’isté
Le Ski Team Alta Badia pîta ativités desvalies por mitans y mituns dla scolina, dla elementara y dla mesana, cun n program che se desfira döt le de. Les iscriziuns vëgn daurides ai 24 de forá dales 8:00
Sport+creativity all day
Por i mëndri dla scolina (nasciüs tl 2019) vëgnel pité a La Ila les ativités »Sport + creativity all day«, plü avisa tles edemes dai 14 ai 18.07., dai 28.07. al 01.08., dai 11 ai 15.08. y dai 25 ai 29.08., dagnora dal lönesc al vëndres dales 9:00 ales 15:00. Le cost é de 130,00€ al’edema (marëna lapró). Iscriziuns dai 24.02. inant, anter i 2 de merz al link https://forms.gle/Ao5M77Wakoika5RDA
Multisport
»Multisport all day« é les ativités por mitans y mituns dla elementara, che vëgn metüdes a jí ti paisc di comuns de Badia y Corvara; al vëgn fat trëi grups: »kids 1« por i nasciüs dl 2018; »kids 2« por i nasciüs dl 2016 y 17; »kids 3« por i nasciüs dl 2014 y 15. Le program prevëiga n bloch de 4 edemes, dai 7 de messé fina ai 23 d’agost, tres dal lönesc al vëndres dales 9:00 ales 15:00. Le cost é de 320,00€. Iscriziuns dai 24.02. inant, anter i 2 de merz al link https://forms.gle/EPELdrzpzFCNvTuw8
Edemes de sport
A chi dla mesana, nasciüs dal 2011 al 2013, s’oj l’iniziativa »Sportweek all day«, che prevëiga ativités ti paisc di comuns de Badia y Corvara, sciöche ince jites fora por la provinzia. Al vëgn pité 3 edemes: dai 14 ai 19.07.; dai 29.07. ai 02.08.; dai 11 ai 16.08. – tres dal lönesc ala sabeda dales 9:00 ales 16:00. Le cost é de 130,00€ al’edema (zënza marëna). Iscriziuns dai 24.02. inant, anter i 02.03. al link https://forms.gle/Who3ubmv X1DvmP3Q7
Informaziuns ciafon ala mail info@skiteam altabadia.it, pro Thomas al 339 1433016 o pro Martina al 377 5909449. Infos plü menüdes sön le proiet ciafon sot a ala plata internet www.skiteamaltabadia.it, seziun »news«.

Lezions debant con »Le Muse e le Dolomiti«
La Scola Interregionèla de ciantèr e teater speta i bec dai 6 egn en su te la senta de Moena
La Scola Interregionèla per emparèr a ciantèr e fèr teater per bec e joegn dai 6 egn en su, proponeta da la Sociazion »Le Muse e le Dolomiti«, sporc lezions debant de proa amò per dut l meis de firé. Te sia senta a Moena, te sala Si­monin Maza de la scoles, la Maestra Oda Zoe Hochscheid speta de mèrtesc domesdì, con oraries de poder concordèr, i bec e i joegn che vel emparèr a ciantèr e fèr teater. No l é besegn de aer cogno­scenzes musicales: pel proèr duc chenc. La musega la é emportanta per la cre­scimonia di bec e con »Le Muse e le Dolomiti« i empèra ence a fèr teater. Per info www.musedolomiti.it o chiamèr la presidenta Oda Zoe Hochscheid al numer de telefon 342 9147711.