La Usc di Ladins

I doi dis de garejèdes, ai 4 e 5 de firé, a Folgaria per la selezions nazionèles de l’Alpecimbra Fis Children Cup ge à portà ben ai schiadores ladins. Mattia Vinatzer del Schi Club Gardena, fra del cognosciù campion Alex Finatzer, à vent l slalom strent Under 14 en mercol ai 5 te na seconda manche perfeta. Secondo do la pruma manche a 46 centeisemes dal leader Paolo Peira (Mondole Ski Team), l joen fra d’èrt à fat l mior temp seran su con n destach de 1’’37 proprio su Peira. Sul terzo sciaier l é n auter ladin, l atlet da Soraga Gabriel Dellantonio de la US Monti Pallidi che à confermà l terzo post de la pruma manche. Dellantonio l é stat l soul fascian a esser ruà sul podie e anter i top ten de la classifica. Amò n auter atlet ladin, semper del Schi Club Gardena, se à classificà enveze secondo te sia categoria Under 16 te la garejèda de slalom lèrch: Matthias Mahlknecht che tel slalom strent de la dì dant era ruà terzo. Ge fajon donca i più bie complimenc a chisc trei atlec ladins.

Do i doi dis de garejèdes de la 55^ selezions nazionèles Trofeo Cassa Rurala Vallagarina i delegac de la FISI Paolo Colombo e Alfonso Trilli à ofizialisà i inomes di schiadores che jirà inant te la fasa internazionèla de l’Alpecimbra Fis Childresn Cup de en vender ai 7 e sabeda ai 8 de firé.

Anter i Allievi Under 16 de ic l é Matthias Mahlknecht te la squadra A e anter eles Nicole Piccolruaz del Schi Club Gardena desche resserva.

Di Ragazzi Under 14 l é i gherdeneres Stefan Prinoth e Mattia Vinatzer te la squadra A e l fascian Gabriel Dellantonio desche resserva e anter eles l é Gloria Kostner e Anna Oberhofer da Gherdena desche resserves.

 (Monica Cigolla)