La Usc di Ladins

Ai 28 de jené à la zentrela de Bulsan cherdà l joler cueciun sun l purtoi Saslong, per n’ëila tudëscia che fova tumeda cun i schi. Do na prima valutazion dl dutor iesen julei limpea tl spedel de Bulsan.
Ai 29 de jené ie l prim ntervënt stat sun i purtoies che porta da Colfosch sun Jëuf de Frea: n’ëila slovena fova tumeda cun i schi y se ova fat scialdi mel al spinel. Do la prima cures l’àn meneda tl spedel de Burnech, ulache n à daldò nce menà n ël che se ova fat mel ala cuessa sun l purtoi dla Sponata a La Ila.
Riesc do àn mo fat n ntervënt sal »Glodknopf« sun Mont de Sëuc y ntan l jol de reviers tla sënta, à la zentrela mandà l joler sun Pralongiá: n ël fova tumà ntëur ntan che l jiva cun i schi. N à riesc metù man cun la rianimazion, ma purtruep ne iel stat plu nia da fé.
L ultim ntervënt ie stat a Reba. La zentrela de Belun à cherdà l joler per ti judé a doi turisć che fova fric adum cun i schi, se fajan mel al cë, ala sciabla y al spinel. Tramedoi àn menà tl spedel de Belun.

De plu tla edizion stampeda de La Usc di Ladins o sun l e-paper a paiament www.lausc.it/e-paper