La Usc di Ladins

Tel ultim fin de setemèna l é ruà n auter gran resultat per l joen fascian Matteo Marchioni. L atlet da Cianacei, che tel meis de messèl che vegn l compirà 18 egn e l fèsc pèrt del Artistico Ghiaccio de Fascia Pavei d'arjent, l é jit a Bergamo compagnà da la alenadora Caterina Nemela per tor pèrt ai Campionac taliegn assoluc junior e l é stat bon de se vadagnèr la medaa de or. Do esser ruà al terzo post tel program curt, l à fat n program ledech ezelent e l é stat bon de ruèr a la bela valutazion globala de 147,50 passan via Nikolay Di Tria del Icelab con 142,67 e Nikita Dossena del Iceclub Torino con 142,33.

La contenteza del joen fascian e del Artistico Ghiaccio de Fascia la é amò maora se se conscidra che l se arcedea te na sozietà picola e l é stat bon de arjonjer resultac adertura miores respet a joegn che fèsc pèrt de sozietèdes de bal sui feres trop maores, che à numeres e budget deldut desferenc, con coreografs, organisazion e duta la logistica aldò.

De più su La Usc stampèda de en vender ai 7 de firé.  (Lucia Gross)