La Usc di Ladins

Tla fin dl’edema passada, tla nöt dala sabeda ala domënia incër les 3 da doman, é i Carabiniers da Corvara gnüs cherdá pro n’abitaziun privata dl paisc, olache al ê rot fora n stritoz danter dui colegs de laur. N stritoz che ne s’á baldi nia archité pro les parores; un di dui á tlafinada tut ca n cortel y ti l’á ficé al ater. Canche i Carabiniers é rová söl post, êl ince bele gnü alarmé i socoridus por socodí l’ël de 59 agn, che â n tái ala punza, por fortüna nia dër pesoch. Al é gnü condüt te ospedal da Bornech. Intratan á i Carabiniers inrescí inant ci che al ê sozedü, ince cun l’aiüt de testemonianzes di vijins. Ai á secuestré le cortel y aresté l’ater ël de 54 agn por tentatif de omizid. Chësc é gnü mené te porjun a Balsan, a desposiziun dl’Autorité Iudiziara, che á en mercui da doman convalidé l’arest te na udiënza pro le Tribunal da Balsan. L’ël resta porchël inant te porjun. Le ferí n’á por fortüna nia albü ferides pesoces y á püc dis dedô podü gní fora de spitol.  (pablo)